‘राष्ट्रिय स्वाधीनता र समाजवाद स्थापनाका लागि समाजवादी मोर्चा बनेको हो’

२६ असोज, काठमाडौं । नेपाल कम्युनिस्ट पार्टी (नेकपा)का स्थायी समिति सदस्य अनिल शर्माले राष्ट्रिय स्वाधीनता कायम गर्न र समाजवाद स्थापनाको लागि समाजवादी मोर्चा गठन भएको बताएका छन् । 

समाजवादी मोर्चा मोरङको घोषणा र सन्देश सभालाई सम्बोधन गर्दै नेता शर्माले विकासका नाममा हुने विदेश हस्तक्षेप रोक्ने काम मोर्चाले मात्र गर्न सक्ने बताए । उनले सरकारले काम समाजवादी प्रकृतिको नभएको र उदारवादको दबदबाका कारण देशको आर्थिक अवस्था चौपट हुने अवस्थामा पुगेको बताए । स्वाधिनता र समाजवादले मात्र राष्ट्रियता बलियो हुने र त्यसनिम्ति सबै देशभक्त नागरिक एक ठाउँमा उभिनुपर्ने उनको भनाइ थियो । 

नेपाली समाजको समाजवादसम्मको यात्रा तय गर्न हरप्रकार संघर्षको नेतृत्व गर्न मोर्चा तयार रहेको उनले बताए । मोर्चामा सबै राजनीतिक दलभित्रका देशभक्तहरु सामेल हुन समेत उनले अपिल गरे । नेकपा, माओवादी केन्द्र, एकीकृत समाजवादी र जसपा सम्मिलित मोर्चा दुई महिना पहिले गठन भएको हो । मोर्चाले सात वटै प्रदेशमा सन्देशसभा गरिसकेको छ । पछिल्लो चरणमा नेकपा एक्लैले जिल्ला स्तरमा समेत सन्देशसभा गरिरहेको छ ।