हामीलाई गरिब कसले बनायो ?
विनोद त्रिपाठी
असोज २७, २०८० शनिबार ८:३७:५६
हजुरबुबाको पालामा एक हल गोरु हुने धनी कहलिन्थ्यो । छोराको पालामा एउटा मात्र गोरु पाल्ने अर्को गोरु अर्मपर्म गरेर काम चलाउन थालियो । नातिको पालामा त्यो पनि हरायो । गोरुको सट्टा गाडी, मोटरसाइकल, स्कुटी हुन थाले । अहिले शहरमा मात्र होइन, गाउँका अधिकांश घरमा यस्तै दृष्य देखिन्छ । सडक पुगेका अधिकांश ग्रामीण वस्तीका घरमा आफ्नै सवारीसाधन हुन्छन् । धेरै नभएपनि एउटा मोटरसाइकल त आँगनमा ठडिएको हुन्छ ।
समय परिवर्तनशील छ । यही परिवर्तनले हामीलाई नयाँ सामग्रीको जोहो दिलाउँछ । जसरी हजुरबुबाको पालामा हलगोरु हुने धनी हुन्थ्यो, अहिले गाडी हुनेलाई धनी भनिन्छ । भलै ऋण होस वा जेसुकै होस । तर, हाम्रा दुःख हिजो जस्ता थिए, आज उस्तै छन् । हजुरबुबाको पालामा हिंडेरै मुग्लान (भारत) पस्ने चलन बदलिएर अहिले जहाज चढेर टाढाको देशमा कमाउन जान्छन् । आखिर हिजो पनि कमाउन विदेश नै जानुपर्थ्यो, आज पनि उही विदेश नै । विप्रेषणले धानेको तीन पुस्ता क्रमशः चौथो पुस्तामा सर्ने क्रममा छ । सरकार रेमिट्यान्स कै भरमा छ भने नागरिक त झन अर्को आधार खोज्न सक्ने कुरै भएन ।
अब लागौं, हामी गरिब कसरी भयौं ? एउटा कालखण्ड थियो, ‘बेसाएर खान नपर्ने, हल गोरु पाल्ने, दुहुनु भैंसी हुने र मरमसला पुग्ने खर्च जोहो गर्न सक्ने घर सुखी हुन्थ्यो ।’ शहरमा जन्मे हुर्केकाको यो भन्दा भिन्न अवस्था छ । यो आलेखमा नेपालको बहुसंख्यक जनसंख्यालाई सम्वोधन गरेर समग्र नेपालको तस्विरलाई संकेतले गर्न खोजिएको हो ।
तर, अहिले जमाना धेरै फरक छ । पहिलो जस्तो घरभरि अन्न राखेर धनी बनिँदैन । विलासी जीवनसँग धनी गरिबको मापन हुन्छ । यसको मतलब अझै नेपालमा गरिबी प्रतिशत उस्तै छ । तीसको दशकमा एकछाक भात खाने अर्को छाक मकै खाने घरहरू प्रशस्त हुन्थे । उ बेला मकै वा ढिंडो खाने घरलाई गरिब भनिन्थ्यो । त्यो भ्रमपुर्ण पुस्ता थियो । कयौं परिवारले यति पनि खान पाउँदैनथे । अहिलेको पुस्तालाई भात खान दुःख छैन । किनेरै भएपनि सबैलाई भात पुगेकै छ । तर, गरिबको अनुपात भने घटेको छैन ।
सरकारले आर्थिक वर्ष २०७९–०८० मा सार्वजनिक गरेको रेकर्ड अनुसार अहिले नेपालमा १५ दशमलव १ प्रतिशत नेपाली गरिबीको रेखामुनी छन् । तर नेपाल सरकारको यो तथ्याङ्कमा कुनै सत्यता छैन । युनिसेफ र शेयरकास्ट इनिसियटिभले स्थलगत गरेको सर्वेक्षण अनुसार अहिले नेपालको गरिबको जनसंख्या करिब ३० प्रतिशत वरपर छ । अर्थात करिब ५० लाख नेपाली पुरै गरिब छन् । तीसको दशकको जनसंख्यालाई आधार मान्ने हो भने करिब आधा जनसंख्या नै गरिब रहेछन् ।
तथ्याङ्क विभागका अनुसार २०२८ सालमा नेपालको जनसंख्या एक करोड १५ लाख ५६ हजार थियो । अहिले करिब ३ करोड जनसंख्या मध्ये ५० लाख गरिब हुनु भनेको परिणामतः हामी ५० वर्षसम्म उही अवस्थामै छौं । नेताहरूले दावी गरे जस्तो हाम्रो गरिब जनसंख्या घटेकै छैन ।
‘काम देउ’ नारा किन लाग्दैन ?
बितेका ५० वर्षमा हाम्रा सडकहरूमा कुनै न कुनै नारा गुन्जिए । न्यायका लागि, कारबाहीका लागि । तर, कुनै पार्टी, समुह, संस्था र अभियानले रोजगार चाहियो भनेनन् । यो अवधिमा तीन प्रकारका शासन नेपालले व्यहोर्यो । पञ्चायत, बहुदल र गणतन्त्र । अनेक पात्रहरू प्रधानमन्त्री र मन्त्रीहरू भए । दर्जनौं कार्यविधि तयार गरिए । यति मात्र होइन, राजनीति परिवर्तनका लागि सयौंले ज्यान नै दिए । तर, आजसम्म कसैले रोजगार चाहियो भनेर आन्दोलन चलाएन ।
अहिले माइतीघरमा दैनिक आन्दोलनका दर्जनौं समुह अड्डा जमाएर बसेका छन् । कसैले रोजगारको माग राखेर आन्दोलन गरेको छैन । हाम्रा सडकका नाराले नै नेतालाई मात्र धनी बनाउने बाटो देखाएको छ, अनि नागरिक कसरी गरिब नहुन । कुनै दलका भातृसंगठन, कुनै विपक्षी दल, कुनै नेता र कुनै अभियन्ताले नेपालमा जनतालाई काम देउ भनेर आवाज उठाएको सुन्नुभएको छ ? विल्कुल छैन । कुनै कुनै नेता वा दलले अन्य मागहरुको बीचमा घुसाएर एकाध संकेत गरेपनि एक मात्र मुल एजेण्डा रोजगारमा केन्द्रित माग अहिलेसम्म कसैले उठाएको छैन ।
विकसित देशले त्यतिकै विकास गरेका थिएनन् । उनीहरुमा नागरिक चेत उच्चस्तरीय थियो । सन १९८८ मा फ्रान्सका जनता एकैपटक सडकमा उत्रेर रोजगारको माग उठाएका थिए । उता सन १९४५ सम्म चलेको दोस्रो विश्वयुद्धपछि सारा युरोपेली जनता काम देउ भनेर घरघरबाट निस्किएका थिए । चीनले त अहिले पनि हरेक वर्ष रोजगार मेला लगाउँछ, जहाँ वार्षिक करिब ३ करोड जनताले नयाँ काम पाइरहेका हुन्छन् ।
विश्वमा यस्ता सयौं उदाहरण छन्, जहाँ जनताले शासकलाई मार्गनिर्देशन गरिरहेका हुन्छन् । तर, नेपालमा भने ठीक उल्टो छ । आफ्नो नेता पक्राउ पर्दा वा विपक्षी दलको सरकारको विरोधमा जुलुस निस्कने गर्छ । तर, मलाई, मेरा छोराछोरी, बहिनी भाई, मेरो छिमेकी, मेरा कार्यकर्ता, हाम्रा जनतालाई काम चाहियो भनेर कोही अनसन बसेन । कसैले अभियान सुरु गरेन । कुनै पार्टीले ‘जनतालाई काम खोई’ भनेर नेपालबन्द गरेन । रोजगार चाहियो भन्ने विज्ञप्ति आएन । सरकार बदल्न हामीले भएभरको वल लगायौं । तर, हाम्रो जीवनपद्धति फेर्न कहिल्यै जाग्न सकेनौं । अब भन्नुस, हामीलाई कसले गरिब बनायो ? तपाईँले यो प्रश्न भित्र सजिलै उत्तर पाउनुहुनेछ ।
हराउँदै गएको वर्गीय आन्दोलन
विभिन्न कालखण्डमा नेपालका दलहरूले वर्गीय आन्दोलन पनि गरे । ती आन्दोलन गर्नेहरू अहिले सत्ता र शक्तिकै वरपर छन् । सत्तामा गएपछि कार्यकर्ताले नेताहरूलाई सोधेनन्,‘हामीलाई रोजगार खोई ? हरेक वर्ष सरकारले प्रतिव्यक्ति आय बढेको विवरण सार्वजनिक गर्छ । एकथरि जनता यस्ता प्रतिवेदन हेरेर मक्ख पर्छन् । रित्तो खल्ती लिएर दुखी मनले यस्ता रिपोर्टहरुमा विश्वास गर्दा ५० वर्षदेखि जनता कामविहिन बनेका छन् । प्रतिव्यक्ति आय भनेको देशको आम्दानीसँग जनसंख्याले भाग गरेर निकालेको एक हिसाब हो । अर्थात, विनोद चौधरीको खर्बको सम्पति र विनोद चेपाङको शुन्य सम्पातिको बीचको अनुपात दर हो । धनी व्यक्ति उकालो लाग्दै गयो, गरिब व्यक्ति झन झन ओरालो । यसैले त सत्ताधारीले जहिल्यै जनतालाई भ्रममा पारेका छन् ।
अर्को विषय छ, देशको कुल आय । यतिका राजनीति परिवर्तनले नेपालको जीडीपी कहिल्यै बढेन । जीडीपी भनेको ग्राँस डोमेस्टिक प्रोडक्ट अर्थात आन्तरिक उत्पादन । यो ५० वर्ष अवधिमा नयाँ उद्योग खुलेनन् । भएका उद्योगले पनि कच्चा पदार्थ विदेशबाटै ल्याएर चलाउनुपर्ने अवस्था सृजना भयो । व्यवसाय कृषि क्षेत्रका उपकरणदेखि बिउविजन सबै आयातीत गरियो । अहिले कुनै पनि व्यवसाय स्व.निर्भरमा आधारित छैन । विदेशबाट सामान ल्याएर संचालन गर्नुपर्ने अवस्था छ ।
नयाँ व्यवस्था आएपछि निजी क्षेत्रमा बैंकहरु संख्या थपियो । तर, यी बैंकहरु जुवाडेका खाल जस्ता भए । दाउ लाग्नेलाई भाग्य बदलिदियो, अभागीलाई खल्ती रित्ताइदियो । अहिले जनतासँग पैसा छैन । उता बैंकमा भने निक्षेप थुप्रेर ५२ खर्ब उकालो लागिरहेको छ । यस्तो सुन्दा अचम्म लाग्छ । जनता पैसा नपाएर व्यवसाय गर्न पाएका छैनन् । बैंक लगानी गर्न नपाएर पैसा थुपार्दै बसेका छन् । यस्तो अवस्था सृजना हुनु सरकारको अदुरदर्शी आर्थिक नीति हुनु हो । विकसित देशमा नागरिकले गर्ने व्यवसायमा घाटा सरकारको हुन्छ । नाफा व्यवसायीले उपयोग गर्न पाउँछ । तर, नेपालमा भने ठीक उल्टो छ । नोक्सान भयो भने त्यसको भरपाई जनताले व्यहोर्नुपर्नेछ बाध्यता छ । अनि कसले यो जोखिम उठाउन आँट गरोस् ।
सन २०१५ मा नेपालले एउटा वृहत् लक्ष्य अघि सारेको थियो । त्यो हो, चरम गरिवीलाई ५ प्रतिशतमा झार्न प्रतिव्यक्ति आयलाई सन् २०३० सम्म २५ सय अमेरिकी डलर पुर्याउने । तर, यो योजना पुरा गर्ने नेपाल सरकारले कुनै आधार दिन सकेको छैन । नेपालले परिभाषित गरेको गरिब सन २०३० मा ५ प्रतिशतभन्दा कम हुने भनिएको छ । अहिले सन २०२३ सम्म आइ पुग्दा धमाधम व्यवसाय छोडेर नागरिक विदेशीन थालेका छन् । दलहरूका हावादारी गफले ५० वर्षदेखि देशको अर्थतन्त्र थिलोथिलो भएको छ ।
यस्तो देख्दा देख्दै यिनै दल र यी नेतालाई संरक्षण गर्ने कार्यकर्ता घटेका छैनन् । एकले अर्कोलाई दोष दिएरै नेताहरूले देश लुटिरहँदा कार्यकर्ताहरू भने यिनै नेताहरूलाई जोगाउन खम्बा बनेर उभिन्छन् । संसारमा भ्रष्टाचारलाई जोगाएर देश धनी भएको उदाहरण कहीं छैन । एक–एक जनतालाई ‘मलाई काम चाहियो’ भन्दै सडकमा उत्रने सद्बुद्धि प्राप्त नभएसम्म हामी गरिब बनिरहनेछौँ । अहिलेसम्म ‘आफ्नो लागि आफैले कामको माग’ किन उठाएनौं ? अब भन्नुस, हामीलाई गरिब कसले बनाएको रहेछ ?
विनोद त्रिपाठी
लामो समय व्यवसायिक पत्रकारितामा डटेर लागेका पत्रकार त्रिपाठी विभिन्न मुलधारका राष्ट्रिय दैनिक, टेलिभिजन र अनलाइनहरुमा सम्पादकको भुमिका निर्वाह गरिसकेका छन् । हाल त्रिपाठी नेपालबहसका नियमित स्तम्भकार हुन् ।
लेखकबाट थपसूचना प्रविधि क्षेत्रका प्रगति र चुनौती
बैशाख २०, २०८१ बिहिबार
सूचना तथा सञ्चार प्रविधि दिवस प्रविधिबाट प्रभावित बन्दै ‘सन्देश’ निर्माणको प्रक्रिया
बैशाख २०, २०८१ बिहिबार
लगानी सम्मेलन र लगानी वातावरण निर्माण
बैशाख १८, २०८१ मंगलबार
आईजीकै सचिवालयमा एसएसपी कार्कीको चुरीफुरी !
नेपालबहस संवाददाता
बैशाख १९, २०८१ बुधबार
बिहानै कतार एयरको विमानसँग सिम्रिक हेलिकप्टर ठोक्किन आइपुगेपछि.....
नेपालबहस संवाददाता
बैशाख १८, २०८१ मंगलबार
नबिल बैंकको वीरगञ्ज शाखाबाट १ करोड ३४ लाख नोट चोरी, चोर खोज्दै प्रहरी
नेपालबहस संवाददाता
बैशाख १८, २०८१ मंगलबार
नबिल बैंकबाट चोरिएको रकमसहित भारतको मोतीहारीबाट ३ जना पक्राउ
बैशाख २०, २०८१ बिहिबार
वेस्ट इन्डिज ए सँग नेपालको लगातार तेस्रो हार
बैशाख २०, २०८१ बिहिबार
मटिहानीका खरानीका घर, बौरिने प्रतीक्षामा पीडित
बैशाख २०, २०८१ बिहिबार
टर्कीले तोड्यो इजरायलसँगको व्यापार सम्बन्ध
बैशाख २१, २०८१ शुक्रबार
डढेलो बस्तीमा पस्दा एक जनाको मृत्यु
बैशाख २१, २०८१ शुक्रबार
खडेरीले बाराको दक्षिणी भागमा रोपाइँ भएन
बैशाख २१, २०८१ शुक्रबार
खरबुजा खेतीबाट आकर्षक आम्दानी गर्दै नवलपुरका मीनबहादुर
बैशाख २१, २०८१ शुक्रबार
आजबाट ‘मनसरा’ रिलिज
बैशाख २१, २०८१ शुक्रबार
प्रेस तथा अभिव्यक्ति स्वतन्त्रताबिना लोकतन्त्र पूर्ण हुँदैन : मन्त्री शर्मा
बैशाख २१, २०८१ शुक्रबार