दायाँ बायाँ सजिएको बागमतीको सुन्दर र मनमोहक दृष्य

२७ असोज, काठमाडौं । धार्मिक विशेषता रहेको वाग्मती नदीलाई हिन्दु तथा बौद्ध धर्ममा पवित्र मानिन्छ । नदीलाई सफा बनाउन निरन्तर रूपमा बागमती सरसफाइको अभियान सञ्चालन भइरहेको छ । नदी पूर्ण रुपमा सफा हुन नसके पनि सौन्दर्यीकरण अन्तर्गत बागमती नदीको दायाँ बायाँ कोरिडोरसहित बागमतीलाई सुन्दर र मनमोहक सौन्दर्य थपेको छ । 

उपत्यकाको वातावरण स्वच्छ, पवित्र र सुन्दर तुल्याउने, नदी प्रणालीसँग सम्बन्धित ऐतिहासिक पुरातात्त्विक एवं सांस्कृतिक सम्पदाको संरक्षण गर्ने र सम्पूर्ण वाग्मती सभ्यताको पहिचान गर्ने उद्देश्य बोकेको अधिकारसम्पन्न एकीकृत विकास समितिले वाग्मती करिडोरमा पार्क निर्माणलाई जोड दिँदै आएको छ । 

गोकर्णेश्वर नगरपालिका क्षेत्र हुँदै बग्ने बागमती नदी कोरिडोर सफा र हराभरा भएसँगै बिहान र साँझको समयमा शारीरिक व्यायाम गर्नेहरूको बाक्लो उपस्थिति हुन थालेको छ । त्यसै गरि अत्तरखेल र माकलबारी तिर बाग्मती नदीको किनारमा हरेक साँझ सानोतिनो मेला नै लाग्छ । 
 
सिनामंगलदेखि उत्तर गोकर्णसम्मको कोरिडोर स्वच्छ र सफा भएका कारण आज भोलि साँझतिर मेला नै लाग्ने गर्दछ । यो ठाउँमा नदी किनार सुन्दर छ र फोहर र दुर्गन्धबाट मुक्त भएर बागमती बग्ने गरेको छ । बढ्दो गर्मी र दिनभरको घर, कार्यालयको व्यस्ततामा टहल्ने ठाउँको रुपमा नदी किनार परिणत भएको छ । गोकर्ण क्षेत्रमा नदी किनारमा विश्राम स्थल, क्रियापुत्री घर समेत बनेको छ । 

नेपाल सरकार सहरी विकास मन्त्रालय अधिकार सम्पन्न बागमती सभ्यता एकीकृत विकास समितिले गरेको कामले सो क्षेत्रमा बागमती निकै सफा बग्न पाएको छ ।  समितिले निजी क्षेत्रसहितको सहभागिता नदी किनारामा ३१ वटा हरियाली प्रवर्द्धन तथा उद्यानहरू निर्माण गर्नुको साथै सरकार र एसियाली विकास बैंकको लगानीमा बागमती नदीमा २ वटा प्याकेजमा करिब २० किलोमिटर क्षेत्रमा नदी सौन्दर्य करणको काम भइरहेको छ ।  

नदी वरपर फुटपाथ, साइकल लेन, शौचालय, विश्राम स्थल आदि बनेका छन । यस उदाहरणीय कामले शहरको स्वरुप बदलिएको छ । आयोजनाले सिनामंगल उत्तर गोकर्णसम्मको ७.५ किमी नदीको दुवै किनारा सिँगारेको छ । थापाथली पुलदेखि बल्खुसम्मको क्षेत्रमा पनि यस्तै सिंगारपटार भएको छ ।