मनाङ एयरको एयर अपरेटर सर्टिफिकेट निलम्बन

२७ असोज, काठमाडौं । नेपाल नागरिक उड्डयन प्रधिकरणले मनाङ एयरको एयर अपरेटर सर्टिफिकेट निलम्बन गरेको छ । शनिबार मात्र मनाङ एयरको हेलिकोप्टर दुर्घटनामा परेको थियो । हेलिकप्टर दुर्घटनामा परेको मनाङ एयरको एयर अपरेटर सर्टिफिकेट प्राधिकरणले निलम्बन गरेको हो । 

शनिबार एक सूचना जारी गर्दै प्राधिकरणले मनाङ एयर प्रालिलाई अर्को सूचना जारी नहुँदासम्म निलम्बन गरिएको जनाएको छ । मनाङ एयरको ९ एन–एएनजे कलसाइन भएको हेलिकप्टर ओखलढुंगाबाट रुम्जाटारबाट सोलुखुम्बु जाँदै गर्दा लोबुचे भन्ने ठाउँमा दुर्घटना भएको थियो । 

हाइ अल्टिच्युडमा रहेका यात्रु उद्धार गर्न शनिबार विहान ७ः१३ मिनेटमा उडेको हेलिकप्टर दुर्घटना हुँदा पाइलट पिके सेढाइँ घाइते भएका थिए । यसअघि मनाङ एयरको नाइन एन एएमभी कलसाइनको हेलिकप्टर २६ असारमा पनि दुर्घटनामा परेको थियो । दुई वटा मात्र हेलिकोप्टर भएको मनाङ एयर यो कारवाहीपछि खाली भएको छ ।