बीपीका विचार नमान्दा कांग्रेस कमजोर भयोः शशांक

२७ असोज, काठमाडौं । नेपाली कांग्रेसका नेता डा शशांक कोइरालाले पार्टीभित्र रहेको इतिहास र विचारका कारण कांग्रेस अरू पार्टीभन्दा बलियो रहेको बताएका छन् । नेपाली कांग्रेस र नेविसंघ लमजुङ–काठमाडौँ सम्पर्क समितिले दशैं, तिहार तथा छठ पर्वका अवसरमा आयोजना गरेको शुभकामना आदानप्रदान तथा चियापान कार्यक्रममा उनले पछिल्लो समय कांग्रेसभित्र बीपीको विचार समाप्त हुने डर रहेको बताए । 

बीपीको विचारमा उभिएर पार्टी अगाडि बढेकाले आपसी एकताका साथ बीपीको विचार अंगालेमा कांग्रेसलाई कुनै शक्तिले हराउन नसक्ने नेता कोइरालाले बताए । उनले बीपी कोइरालाको पहिलो सरकारको पालामा नेपालमा विकासको ढोका खुलेको स्मरण गर्दै देशमा भएको सम्भावनालाई उच्चतम प्रयोग गरी विकास र समृद्धिका लागि पार्टीका नेता कार्यकर्ता लाग्नुपर्नेमा जोड दिए । 

कार्यक्रममा कांग्रेस नेता दीलबहादुर घर्तीले १२ बुँदे सम्झौताका आधारमा देशमा शान्ति  र स्थिरता कायम भएको बताउँदै अहिलेको संविधान कांग्रेसको नेतृत्वमा जारी भएकाले कार्यान्वयनको जिम्मेवारी पनि कांग्रेसकै काँधमा रहेको उल्लेख गरे ।

कांग्रेस केन्द्रीय सदस्य नानु बाँस्तोला र लक्ष्मी खतिवडाले पार्टीलाई कमजोर बनाउन विभिन्न शक्ति लागेको भन्दै सचेत भएर अगाडि बढ्नुपर्ने बेला आएको बताए  । कांग्रेस लमजुङका सभापति डा टकराज गुरुङ र पूर्व सभापति भेषबहादुर पौडेलले लमजुङमा पार्टीलाई विजय बनाउन काठमाडौँमा बसोबास गर्ने कार्यकर्ताको ठूलो भूमिका रहेको बताए ।

संविधानसभा सदस्य चन्द्रबहादुर कुँवर, पूर्व सहायकमन्त्री डा रामचन्द्र अधिकारी, कांग्रेस गण्डकी प्रदेशका संगठन विभाग प्रमुख हरि बराल, नेविसंघका पूर्व कोषाध्यक्ष शिव रिमाल, नेविसंघ लमजुङ काठमाडौँ सम्पर्क समितिका अध्यक्ष डिवी पराजुलीलगायतले लमजुङमा अग्रजले गरेको त्यागलाई आत्मासाथ गर्दै काङ्ग्रेसको सङ्गठन विस्तारमा जुट्नुपर्ने बताए  ।