दलका निम्ति सरकारभन्दा जनता प्यारो हुनुपर्छ: ओली

२७ असोज, काठमाडौं । नेकपा एमालेका अध्यक्ष केपी शर्मा ओलीले राजनीतिक दलहरू जनताले आफैं शासन गर्नका लागि खोलेका संस्था भएको बताएका छन् । शनिबार एसियाली राजनीतिक दलहरूको अन्तर्राष्ट्रिय सम्मेलन (आइक्याप)ले आयोजना गरेको स्थायी समितिको चौथो बैठक र एसिया–युरोप राजनीतिक मञ्चको पाँचौं बैठकलाई सम्बोधन गर्दै ओलीले राजनीतिक दलका लागि जनता महत्वपूर्ण हुनुपर्ने बताए ।

राजनीतिक दलहरू तानाशाही व्यवस्था र शासकहरुबाट मुक्ति हासिल गरी आफ्नै शासन कायम गर्न जनताले खोलेका संस्था हुन भन्दै ओलीले राजनीतिक दलका निम्ति सरकार भन्दा जनता ज्यादा महत्वपूर्ण हुनुपर्ने बताए । उनले भने, ’राजनीतिक दलहरूले केबल कार्यकारी शक्तिको अभ्यास गर्न होइन, दीर्घकालीन राष्ट्रिय हितको रक्षा गर्न सक्षम, प्रभावकारी र गतिशील राष्ट्र निर्माण गर्ने दिशामा आफूलाई सम्पूर्ण रूपले केन्द्रित गर्नुपर्दछ । यस सन्दर्भमा राजनीतिक दललाई आफैंलाई निरन्तर केही गम्भीर प्रश्नहरू सोधि रहनुपर्दछ ।’

ओलीले एमालेले लोकतन्त्रमार्फत ‘समृद्ध नेपाल, सुखी नेपाली’को राष्ट्रिय आकांक्षा  पूरा गर्नुलाई आफ्नो पार्टीको कार्यभार ठानेको बताए । अध्यक्ष ओलीले राजनीतिको आदर्श र राजनीतिक दलहरू साँघुरो समूह–सोचबाट निर्देशित हुँदा मानवता प्रताडित हुने भएकाले त्यस साँघुरोपनाबाट बाहिर निस्कनुपर्ने बताए  ।

असहिष्णुताले अन्याय जन्माउँछ । सम्पूर्ण मानवलाई नै अन्याय, द्वन्द्व र कठोरतातर्फ उद्वेलित गराउँछ । त्यसैले हामी राजनीतिक स्थायित्व हासिल गर्दै समृद्धिको यात्रामा अघि बढ्नुको विकल्प छैन, अध्यक्ष ओलीले भने प्रकृति र वातावरण संरक्षण गर्दै साझा र दिगो उन्नति हासिल गर्न सबै राजनीतिक दललाई आग्रह गर्दछु ।

उनले ओलीले हरेक नागरिकका लागि समान अवसर, न्यायमा पहुँच सुनिश्चित गर्ने सपनालाई कार्यरुप प्रदान गर्न राजनीतिक दलहरू मुख्य साधन हुने भएकाले राजनीतिक दलको भूमिकालाई कमजोर ठान्न नहुने विचार व्यक्त गरे । भोलि सम्पन्न हुने उक्त बैठकमा दुई महादेशका साझा भविष्यका निम्ति एसिया र युरोपका राजनीतिक दलका नेता तथा विज्ञबीच समसामयिक विषयमा  छलफल हुने एसिया युरोप पोलिटिकल फोरमका सहअध्यक्ष  एवं आइक्यापका स्थायी कमिटी सदस्य राजन भट्टराईले जानकारी दिए ।  

ओलीले कुनैपनि सरकारबाट गरिने अन्याय एवं पक्षपातले नागरिकको आँखामा सम्बन्धित राजनीतिक प्रणालीको वैधानिकतालाई मात्र नखुम्च्याउने भन्दै यसले आन्तरिक एवं अन्तर्राष्ट्रियस्तरमा समेत अस्थिरता, द्वन्द्व र अराजकता निम्त्याउने बताए । सबैका लागि न्याय, सम्मान र समानता कायम गरी सहअस्तित्व, सहिष्णुता, सद्भाव तथा सहयोगको भावना प्रबर्द्धन गर्न राजनीतिक दलहरूको भूमिका असाधारण हुने उनले विश्वास व्यक्त गरे ।
 
धर्म, संस्कृति, परम्परा तथा सामाजिक मूल्यले मानवताले एकताको सूत्रमा बाँध्ने ओलीको भनाइ थियो । उनले भने, ’धार्मिक विश्वास, संस्कृति, परम्परा, विचार र सामाजिक मूल्यहरू हामी सबैका लागि उत्तिकै प्रिय छन्, जसले मानवतालाई एकताको सूत्रमा बाँध्न सक्दछ । सक्षम शासनको अधार तयार गर्न राजनीतिक दलहरूले नागरिकका यस्ता आकांक्षालाई आफ्नो विचारको काल्पनिकीमा जोड्नुपर्दछ ।’

बैठकमा चीन, दक्षिण कोरिया, भियतनाम, इण्डोनेसिया, थाइल्याण्ड, पाकिस्तान, लेबनान, चेक गणतन्त्र, नेदरल्याण्डस्लगायत मुलुकका २६ राजनीतिक दलका नेता, मन्त्री तथा सांसद गरी ५० जनाभन्दा बढीको सहभागिता छ ।