सेना नचलाउन प्रधानमन्त्री प्रचण्डलाई शेखरको चेतावनी

२८ असोज, काठमाडौं । नेपाली कांग्रेसका वरिष्ठ नेता डा. शेखर कोइरालाले नेपाली सेनालाई नचालउन प्रधानमन्त्री पुष्पकमल दाहाल प्रचण्डलाई चेतावनी दिएका छन् । नेपाली सेना चलाउँदाको परिणाम राम्रो नहुने कोइरालाको सुझाव छ । उनले प्रष्ट नलेखेपनि यसअघि सेना चलाउँदा प्रधानमन्त्री पद छोड्नुपरेको प्रचण्डलाई स्मरण गराउन खोजेका छन् ।   
 
नेता कोइरालाले सेनामा गरिने राजनीतिक चलखेलले दुर्घटना निम्त्याउने हुँदा त्यस्तो कार्य गर्न नहुनेमा उनले जोड दिएका छन् । आइतबार बिहान सामाजिक सञ्जालमा एक्समा उनले सेनामा माओवादीको पूर्वलडाकुका निम्ति नियमको दुरुपयोग गर्ने चलखेल स्वीकार्य नहुने उल्लेख गरेका छन् ।

नेपाली सेना राष्ट्रिय सुरक्षासँग जोडिएको र सधैँ राजनीतिबाट अलग रहेको संस्था भएको भन्दै उनले एक जना तकालिन माओवादीबाट सेनामा आएको व्यक्तिका लागि राष्ट्रि सुरक्षामा आँच पुर्याउने गरी सेनालाई चलाउन नमिल्ने बताएका छन् ।

“नेपाली सेनाजस्तो राष्ट्रिय सुरक्षासँग जोडिएको र सधैँ राजनीतिबाट अलग रहेको संस्थामा माओवादीको पूर्वलडाकुका लागि नियमको दुरुपयोग गर्ने चलखेल स्वीकार्य छैन,” उनले लेखेका छन्, “सेनामा गरिने राजनीतिक चलखेलले दुर्घटना निम्त्याउने हुँदा यस्तो कार्य नगरौँ । सम्बन्धित निकायहरूलाई यो कुराको हेक्का होस् ।”