एसीसी यू–१९ प्रमियर कपः नेपालसामु बहराइनको झिनाे लक्ष्य

२८ असोज, काठमाडौं ।  एसीसी यू–१९ प्रमियर कप क्रिकेटमा बहराइनले नेपाललाई सामान्य लक्ष्य प्रस्तुत गरेको छ । टस जितेर पहिले ब्याटिङ गरेको बहराइनले ३७ दशमलव ५ ओभरमा अलआउट हुनु पूर्व ७७ रन मात्रै बनाउन सकेको हो । 

खेलमा नेपालका लागि दिपेश कँडेलले ६ र दुर्गेश गुप्ताले चार विकेट लिए । ९ दशमलव ५ ओभर बलिङ गरेका दिपेशले मात्र ४ रन खर्चिए । ८ ओभर बलिङ गरेका दुर्गेशले २२ रन दिए ।

यस्तै, बहराइनका मुहममद बसिल अब्दुल हक्कीमले ३४ रन जोड्नुबाहेक अन्य ब्याट्सम्यानले दोहोरो अंक जोड्न सकेनन । नेपालले १७ रन एक्स्ट्रा दिएको थियो ।

प्रिमियर कपमा एसियाका १६ एसोसिएट टोलीले ४ समूहमा रहेर प्रतिस्पर्धा गर्दैछन् । शीर्ष ४ टोलीले आगामी डिसेम्बरमा पाकिस्तानमा हुने यू-१९ एसिया कप खेल्न खेल्नेछन् ।