यो वर्ष १० वटा जहाज थप्ने लक्ष्य छः मन्त्री किराती

२८ असोज, काठमाडौं । संस्कृति, पर्यटन तथा नागरिक उड्डयनमन्त्री सुदन किरातीले यो आर्थिक वर्षमै १० जहाज थप्ने योजना सरकारको रहेको बताएका छन् । नेपाल वायुसेवा निगमका जहाज खरिद गर्ने प्रक्रिया दशै अगाडी नै सुरु हुने उनले बताएका छन् । 

आइतबार मन्त्री निवास पुलचोकमा सत्तारुढ दल नेपाली कांग्रेसको विद्यार्थी संगठन (नेविसंघ) ले चाडबाडका बेलामा हुने भाडादरमा कालोबजारीलाई नियन्त्रण गर्न आग्रह गर्दै बुझाएको ज्ञापनपत्र ग्रहण गर्दै उनले यस्तो बताएका हुन् ।

उनले नेपाल वायुसेवा निगमको जहाज थपेर भाडादरमा देखिएको विसंगतिलाई बजार हस्तक्षेप गर्नु नै एकमात्र विकल्प रहेको बताए । किरातीले १० वटासम्म जहाज नथपी पर्यटकहरु नेपाल नआउने दाबी गर्दे  दसैंअघि नै औपचारिक रुपमा विमान खरिद प्रक्रिया अघि बढ्ने जानकारी दिए । 
 
मन्त्री किरातीले आजैदेखि नेपालगञ्जबाट दुर्गम क्षेत्रका लागि नेपाल एयरलाइन्सको विमान दशैभर सञ्चालन गर्ने प्रतिबद्धता गरे । उनले अहिले फ्युल बढेका कारण भाडादर बढेको भन्दै चाडवाडका बेलामा हुने कालोबजारीलाई रोक्न मन्त्रालय सम्बन्धित निकायसँग छलफल गरी वक्तव्य जारी गर्ने बताए । उनले सबै महंगी नियन्त्रण गर्न सरकारले छुट दिन सक्नुपर्ने बताए ।