दशैं मुखैमा आइपुग्दा पनि सर्लाहीका उखु किसानले पाएनन् अनुदान रकम

२८ असोज, काठमाडौं । सर्लाहीका उखु किसान अmझै सरकारबाट अनुदान वापतको रकम पाउनबाट वञ्चित छन् । उनीहरुले अनुदानवापत पाउनुपर्ने २९ करोड रुपैया अझै पाउन सकेका छैनन् । उखु बिक्री गरेको ७ महिना बितिसकेको छ । 

किसानले जिल्लामा सञ्चालनमा रहेका तीनवटा चिनी उद्योगलाई ४१ लाख क्विन्टलभन्दा बढी उखु बेचेका थिए । सरकारले प्रति क्वीन्टल ७० रुपैयाँका दरले अनुदान दिने घोषणा गरेको थियो । त्यसबाट हाल जिल्लाका उखु किसानले २९ करोड २५ लाख ५२ हजार सात सय ४९ रुपैया पाउनुपर्ने नेपाल उखु उत्पादक किसान महासंघका अध्यक्ष कपिलमुनी मैनालीले बताएका छन् ।

मुख्य चाड दशैंमा पनि खर्च टार्न अनुदान रकम नपाउँदा किसान निराश भएको उनले बताए । किसाहरूले अनुदान रकम दशैंमा पाउने आशमा बसिरहेको तर, आजसम्म राज्यबाट कुनै चासो नदेखाएको उनको भनाइ छ ।

इन्दुशङ्कर चिनी उद्योग हरिवन, महालक्ष्मी चिनी उद्योग बगदह र अन्नपूर्ण चिनी उद्योग धनकौललाई आर्थिक वर्ष २०७९/८० मा १८ हजार दुई सय ८६ किसानले ४१ लाख ७९ हजार तीन सय २४ दशमलव ९९ क्विन्टल उखु बिक्री गरेका थिए । उक्त आवका लागि सरकारले उखुको मूल्य प्रतिक्विन्टल ६ सय १० निर्धारण गरेको थियो ।