रथि राणा बिदामा, अबको प्रधानसेनापति पाण्डे कि सिग्देल ?

२८ असोज, काठमाडौं । नेपाली सेनाका रथी सरोजप्रताप राणाले शुक्रबार अवकाश पत्र बुझेर आइतबारदेखि बिदामा बस्दैछन् । सेनाको दोस्रो नम्बरमा रहेका बलाधिकृत रथी राणाको नियमित कार्यकाल सकिनुभन्दा १५ दिनअघि आइतबारबाट बिदा बसेका हुन् ।  सेनामा राणासँगै अर्का रथी सीताराम खड्काको समेत अवकाशमा जाने समय नजिकिँदै गर्दा राणा बिदामा बसेका हुन् । खड्का उमेर हदका कारण आगामी पुस ३ मा अवकाशमा जाँदैछन् ।

नेपाली सेनामा राणाको पदावधि थपको चर्चा चलेपनि राणाको पदावधि भने थप भएन । उनी २०७८ कात्तिक ११ मा सेनाको रथीमा बढुवा भएका थिए । सेनाले राणालाई अवकाशको पत्र दिइसकेको स्रोतले जनाएको छ । सेनामा रथीको कार्यकाल सकिनु १५ दिनअघि बिदामा बस्ने प्रचलन छ । प्रधानसेनापति प्रभुराम शर्मा बेलायत भ्रमणबाट फर्केपछि उनी (आज) आइतबारबाट विदामा बसेका हुन् । 

राणाको पदावधि थप भएको अवस्थामा उनी आगामी मंसिर २६ सम्म सेनाको रथीमा कार्यरत हुने अवस्था थियो । तर, उनको पदावधि थप नगरी प्रधान सेनापति शर्मा बेलायत गएका थिए । राणा बिदामा बसेसँगै रिक्त ठाउँमा वरियतामा अघि रहेका सेनाको युद्धकार्य महानिर्देशक रहेका उपरथी ताराध्वज पाण्डे रथीमा बढुवा हुने संभावना छ । यद्यपि अशोकराज सिग्धेल पनि रथी पदका लागि दौडमा रहेका छन् । पाण्डे र सिग्देल मध्ये जो रथी हुन्छ ती मध्ये एक जना भावी प्रधानसेनापतिका दावेदार हुन् । सेनाका बलाध्यक्ष रथी खड्काले पुष ३ मा अवकाश पाएपछि अर्का उपरथीको रथीमा बढुवा हुनेछ । 

प्रधान सेनापतिले पाण्डे वा सिग्देललाई बढुवा नगरी पुस ३ सम्म कुर्ने अवस्था पनि उत्तिकै छ । सेनामा सैनिक अधिकारीहरूको पदावधि थप गर्ने नगर्ने अधिकार प्रधान सेनापतिमा छ । हालका प्रधान सेनापति शर्माले आगामी भदौ २४ मा ३ वर्षे कार्यकाल पुरा गरेर अवकाश पाएसँगै पाण्डे र सिग्देलमध्ये एक जना सेनाको ४५ औं प्रधान सेनापति नियुक्त हुनेछन् । त्यसका लागि अहिले उनीहरू मध्ये एक जना रथीमा बढुवा हुनुपर्छ ।