गठबन्धन भत्काउने षडयन्त्र असफल बनायाैं : प्रधानमन्त्री

२८ असोज, काठमाडौं । प्रधानमन्त्री पुष्पकमल दाहाल प्रचण्डले गठबन्धन भत्काउने षडयन्त्र विफल भएको बताएका छन् । चितवनको भरतपुरमा आयोजित जखडीमाई सहलगानी, शरदानगर र दिव्यनगरकाे खानेपानी आयोजनाको उद्घाटन कार्यक्रमलाई सम्बोधनका क्रममा उनले संघ र प्रदेशमा सरकारको नेतृत्व गरिरहेको गठबन्धनविरुद्ध अनेकन षडयन्त्र भएपनि त्यसलाई भत्काउन सफल भएको बताए ।

उनले सरकारले समाजवादको आधार तयार पर्न चालेको कदमलाई असफल बनाउन केही राजनीतिक दल लागिरहेको बताउँदै कोशी प्रदेशबाट त्यसलाई असफल पारिदिएको बताए । गठबन्धन पाँच वर्षसम्म जाने समेत दाबी गरे । सरकारले राष्ट्र र जनताको पक्षमा काम गर्न तल्लिन रहेको र कामबाटै विरोधीहरु पाखा लाग्ने उनको भनाइ छ ।

उनले देशभित्रका सबै नागरिकलाई स्वच्छ खानेपानी उप्लब्ध गराउन सरकार कटिवद्ध रहेको र त्यसअनुप काम भइरहेको समेत बताए । सुशासन, सामाजिक न्याय र आर्थिक सम्वृद्धिका पक्षमा सरकारले आफ्नो प्रतिवद्धता पूरा गर्दै गइरहेको बताउँदै राष्ट्रिय स्वाधिनता र स्वतन्त्रतामा पनि सरकार प्रतिवद्ध रहेको बताए । उनले नेपाली भूमि कालापानीको गुन्जी क्षेत्रमा हालै मात्र भारतीय प्रधानमन्त्री नरेन्द्र मोदीको प्रवेशबारे केही बताएनन् ।

कार्यक्रममा धारणा राख्ने क्रममा प्रचण्ड पुत्री एवं भरतपुर महानगरका प्रमुख रेनु दाहालले दुई वर्षभित्र भरतपुर महानगरका सबै नागरिकलाई शुद्ध खानेपानी उपलब्ध गराउने प्रतिवद्धता व्यक्त गरिन् ।