कोशीमा मध्यावधि रोक्न एमालेले साथ दिएको होः ओली

२८ असोज, प्युठान । नेकपा एमालेका अध्यक्ष केपी शर्मा ओलीले कोशी प्रदेशलाई मध्यावधिमा जानबाट रोक्नका लागि कांग्रेस बिद्रोहलाई समर्थन गर्नुपरेको बताएका छन । उनले तत्कालका लागि मध्यावधि रोक्ने अर्को उपाए नभएकाले कांग्रेसका विद्रोहीलाई साथ दिएको बताएका छन् । 

प्युठानको बिजुवारमा नेकपा एमाले प्युठानद्वारा आयोजित अगुवा कार्यकर्ता भेटघाट कार्यक्रमलाई सम्बोधन गर्दै उनले मध्यावधिमा जाँदा देशले ठूलो आर्थिक भार खेप्नुपर्ने देखिएकाले त्यसलाई रोक्न एमालेले कांग्रेस बिद्रोहलाई समर्थन गरेको बताए ।

आफूहरू जोसुकैलाई समर्थन गरेर भए पनि कोशीलाई मध्यावधिबाट जोगाउने पक्षमा रहेको भन्दै ओलीले देशको आर्थिक अवस्था नाजुक छ, मध्यावधिमा जाँदा देशलाई ठूलो खर्च हुने देखेर मध्यावधि जोगाउन कांग्रेस विद्रोहलाई समर्थन गरेको बताए । 

कोशी प्रदेशमा नेपाली कांग्रेस शेखर कोइराला समूहका ८ जनाले विद्रोह गरेर एमालेका सांसदको समेत समर्थनमा केदार कार्की मुख्यमन्त्री भएका छन् । उनले आजै शपथ लिएर तीन सदस्यीय मन्त्रिमण्डल पनि बनाएका छन् ।