सिरहा प्रहरीले ल्यायो चाडपर्व लक्षित विशेष सुरक्षा योजना

२८ असोज, काठमाडौं । बडा दशैं, तिहार र छठ पर्व नजिकिँदै गर्दा सिरहा प्रहरीले  ‘चाडपर्व लक्षित सुरक्षा योजना २०८०’ अगाडि याएको छ । चाडपर्वको वेलामा आपराधिक समूहबाट हुनसक्ने चोरी, डकैती, लुटपाट तथा उच्छृङ्खल घटनालाई निरुत्साहित गर्न ९४४ जना प्रहरी जनशक्ति परिचान गर्ने योजना तयार पारिएको जिल्ला प्रहरी कार्यालयले जनाएको छ । 

पर्वमा अपराधिक तथा उच्छृङ्खल घटना हुन नदिन योजना ल्याइएको हो । सुरक्षाका लागि ५५९ जना बाह्य सुरक्षामा र ३७७ जना रिजर्भ टोलीसहित ९४४ जना प्रहरी जनशक्ति परिचालन गरिने प्रहरी प्रमुख एसपी टेकुनन्द इवा लिम्बूले बताए । 

प्रहरीको नियमित चेकिङ्ग ९ छड्के ५ र ट्राफिक प्रहरीको ८ गरी जम्मा २२ चेकिङ स्थल रहने उनले बताए । पैदल ४०, साइकल १०, मोटरसाइकल ३५, गाडी मोवाइल १२ र एसआरपी÷एलआरपी २२, सादा पोशाक ५ र क्यूआरटी ५ समूहलाई परिचालन गरिने प्रहरी प्रमुख एसपी इवा लिम्बूले बताए ।

प्रहरीले महत्वपूर्ण प्रतिष्ठान, पूर्वपश्चिम राजमार्ग, सहायक तथा हुलाकी मार्ग, बैंक तथा वित्तिय संस्था, सुच चाँदी पसलहरु लगायत मुख्य मुख्य बजारको सुरक्षा ड्यूटीमा खटाइने उनले बताए । 

जिल्लाको सुरक्षा व्यवस्था चुस्त बनाउन विशेष अधिकार प्रत्यायोजक गरी प्रहरी निरीक्षकको कमाण्डमा १० जना प्रहरी जनशक्तिको चाडपर्व लक्षित विशेष सुरक्षा कार्यदल गठन गरिएको छ । 

सूचना संकलन तथा विश्लेषण तथा सम्प्रेशण गर्न विशेष टोली गठन गरिएको छ । सुरक्षा चुनौतीका बारेमा आवश्यक समन्वय र सहकार्य गर्ने व्यवस्था गरिएको छ । प्रहरीले सीमा नाका लगायत ७ स्थानमा यात्रु सहायता कक्ष समेत स्थापना गरेको छ ।