सर्वोच्च अदालतले दशैं बिदामा बन्दी प्रत्यक्षीकरण रिटमा सुनुवाइ गर्ने

२९ असोज, काठमाडौं । दशैं बिदामा पनि सर्वोच्च अदालत खुला हुने प्रशासनले जनाएको छ । प्रशासनका अनुसार दशैं बिदाको समयमा पनि सर्वोच्चले बन्दी प्रत्यक्षीकरणको मुद्दामा सुनुवाइ गर्नेछ । 

इजलास संचालनका लागि सर्वोच्चले असोज २९ गतेदेखि कात्तिक १० गतेसम्म सर्वोच्च अदालतमा उपस्थित हुने न्यायाधीशहरूको सूची प्रशासनले सार्वजनिक गरेको छ ।  बन्दी प्रत्यक्षीकरण रिट शनिबार र विजय दशमीको दिनबाहेक बिहान ११ बजेदेखि अपराह्न ३ बजेसम्म सुनुवाइ हुने जनाएको छ । 

आजका लागि न्यायाधीश सपना प्रधान मल्ललाई जिम्मेवारी तोकिएको छ । उनले त्यस दिन बन्दी प्रत्यक्षीकरणको निवेदनमाथि सुनुवाइ गर्नेछिन् । भोलि असोज ३० गते मंगलबारका लागि न्यायाधीश डा. आनन्दमोहन भट्टराईलाई जिम्मेवारी तोकिएको छ । 

तर प्रशासनले आफ्नाे वेभसाइट भने (डिएक्टिभ) निष्क्रिय गरेकाे छ । हिजो घटस्थापनाका दिन भने अदालत बन्द रह्यो ।

यस्तै, दशैं बिदाका दिन उच्च र जिल्ला अदालतहरूसमेत खुला हुने भएका छन् । जरुरी पक्राउ पुर्जीको अनुमोदन र पक्राउ पुर्जी जारी गर्ने कामका लागि जिल्ला र उच्च अदालतहरु खुला रहने भएका हुन् । सबै तहका अदालत कार्तिक १२ गतेबाट नियमित संचालन हुने भएका छन् ।