पठाओ र इनड्राइभमा अफलाइन चलाउने ७ दर्जन चालक प्रहरी नियन्त्रणमा

२९ असोज, काठमाडौं । ड्राइभ सेयरिङ एप पठाओ र इनड्राइभ अफलाइन चलाउने झण्डै ७ दर्जन चालकलाई काठमाडौं प्रहरीले नियन्त्रणमा लिएको छ ।

सोमबार काठमाडौंका विभिन्न स्थानबाट उनीहरुलाई नियन्त्रणमा लिएको काठमाडौंका प्रहरी प्रवक्ता एसपी कुमोध ढुंगेलले जानकारी दिएका छन् । आरो्पीहरुले अनाधिकृत तवरले सर्वसाधारणहरूलाई ओसारपसार गरेको पाइएपछि पक्राउ गरिएको ढुंगेलको भनाइ छ । 

आपराधिक घटनामा यस्ता सवारीहरुको संलग्नता देखिएको र सुरक्षा संवेदनशीलताको दृष्टिबाट थप जोखिम हुने भएका कारण उनीहरुलाई पक्राउ अनुसन्धान अगाडि बढाइएको प्रहरीको भनाइ छ । 

प्रहरीले अफलाइन चलाउने पठाओ र इनड्राइभमा चढेर सवारी नगर्न पनि यात्रुहरूलाई अनुरोध गरेको छ । अफलाइनमा चढ्दा दुर्घटना परेकाे बेला बीमा सुविधा पाउन समेत यात्रु वञ्चित भएकाे एक तथ्याङ्कले देखाएकाे छ ।