गृहमन्त्री श्रेष्ठ सप्ताहव्यापी भ्रमणका लागि चीन प्रस्थान

२९ असोज, कठमाडौं । उपप्रधानमन्त्री एवं गृहमन्त्री नारायणकाजी श्रेष्ठ जनवादी मुलुक चीनको औपचारिक भ्रमणका लागि आज त्यसतर्फ प्रस्थान गरेका छन् । उनलाई बिदाई गर्न त्रिभुवन अन्तर्राष्ट्रिय विमानस्थलमा उनलाई गृहसचिव दिनेशकुमार भट्टराई, प्रहरी महानिरीक्षक वसन्त कुँवर, नेपालका लागि चिनियाँ राजदूत चेन सोङलगायतले बिदाइ गरेका छन् । 

मन्त्री श्रेष्ठ चीनका पब्लिक सुरक्षासम्बन्धी मन्त्री तथा स्टेट काउन्सिलर तथा चिनियाँ कम्युनिस्ट पार्टी केन्द्रीय सचिवालयका सदस्य वाङ सियाहोङको निमन्त्रणामा भ्रमणमा निस्केका हुन् । चीनमा रहँदा उनी चीनले बेइजिङमा आयोजना गर्ने  ‘थर्ड बेल्ट एन्ड रोड फोरम फर इन्टरनेसनल को–अपरेसन’ कार्यक्रममा सहभागी हुनेछन् । 

कार्यक्रम आगामी कात्तिक १ र २ मा हुँदैछ । कार्यक्रमको उद्घाटन चिनियाँ राष्ट्रपति सी जिनपिङले गर्दैछन् । चिनियाँ राष्ट्रपतिले बिआरआई अवधारणा अघि सारेको एक–दशकका अवसरमा कार्यक्रम हुन लागेको हो ।  नेपालले सन् २०१७ मेमा बिआरआईको फ्रेमवर्क एग्रिमेन्टमा हस्ताक्षर गरेको थियो । 

श्रेष्ठले कार्यक्रममा अन्य देशबाट आएका पाहुनाहरुसँग पनि भेटघट गर्ने कार्यक्रम रहेको उनका प्रेस सल्लाहकार कमल गिरीले बताए । श्रेष्ठ चीनमा हप्ता दिन रहनेछन् ।