माओवादी केन्द्रले मुख्यमन्त्री कार्कीलाई विश्वासको मत दिने

२९ असोज, काठमाडौं । नेकपा (माओवादी केन्द्र)ले एमालेको समर्थनमा कांग्रेसबाट कोशी प्रदेशका मुख्यमन्त्री केदार कार्कीलाई विश्वासको मत दिने भएको छ ।

केन्द्रको आज सोमबार बसेको कोशी प्रदेश सचिवालय बैठकले पार्टी केन्द्रीय कमिटीको सहमति लिएर विश्वासको मत दिने निर्णय गरेको माओवादी केन्द्र प्रदेश सचिवालयले जनाएकाे छ । शनिबार मुख्यमन्त्री बनेका कार्कीले बुधबार विश्वासको मत लिँदैछन् । यसनिम्ति कोशी प्रदेशसभा सचिवालयले आज एक सूचना प्रकाशित गरेर प्रदेशसभा बैठक आगामी कार्तिक १ गते बस्ने जानकारी प्रदेशसभा सदस्य (सांसद)हरुलाई दिइसकेको छ ।

नेकपा एमालेका ३९ र नेपाली कांग्रेस विद्रोही समूहका ८ सांसदको समर्थनमा कार्की शनिबार मुख्यमन्त्री बनेका थिए । उनीसँगै माओवादी केन्द्रले कांग्रेसका २१ सांसद, माओवादी केन्द्रका १३, एकीकृत समाजवादीका ४ र जसपाका १ सांसदकाे समर्थन लिएर पार्टीको संसदीय दलका नेता इन्द्र आङबोलाई मुख्यमन्त्री नियुक्तिका लागि अगाडि सारेको थियो ।

तर समर्थक सांसदहरूकाे सनाखत गर्ने क्रममा कार्कीकाे पक्षमा ४७ मत पुगेपछि प्रदेश प्रमुख परशुराम खापुङले उनलाई मुख्यमन्त्री नियुक्त गरेका थिए ।

९३ सदस्यीय प्रदेशसभाबाट कार्कीले पद जाेगाउन कम्तीमा ४७ सदस्यकाे मत पाउन अनिवार्य छ । उक्त मत पाउन नसक्ने भएकै कारण यसअघि एमालेबाट मुख्यमन्त्री रहेका हिक्मतकुमार कार्कीले गत बुधबार पदबाट राजीनामा दिएका थिए । राजीनामापछि खाली कुर्सीमा केदार कार्कीले माैका पाएका हुन् ।