एमालेले गर्यो मधेश प्रदेशसभा बैठक अवरुद्ध

२९ असोज, काठमाडौं । नेकपा (एमाले)का प्रदेश सांसदहरुले आज बसेको मधेश प्रदेशसभाको बैठक नेकपा एमालेका सांसदहरुले अवरुद्ध गरेका छन् । उनीहरुले सरकारले बजेट बाँढफाँट, नीतिगत निर्णय तथा बजेट कार्यान्वयनमा मनोमानी गरेको भन्दै बैठक अवरुद्ध गरेका हुन् ।

सभामुख रामचन्द्र मण्डलले बैठक सुरु गरेलगत्तै एमाले सांसदहरुले उठेर विरोध गरेका थिए । सांसद दीपेन्द्र ठाकुरले प्रत्यक्ष निर्वाचित प्रतिनिधिको रोहवरमा उपभोक्ता समिति बनाउने र बजेट विनियोजन गर्ने सहमतिबाट मुख्यमन्त्री पछि हटेको आरोप लगाए ।

यसअघि एमालेसँग प्रदेश सरकारले गरेको सहमति कार्यान्वयन नभएको उनको आरोप छ । सहमति कार्यान्वयनमा १५ दिनको समय मागेकोमा महिनौं बित्दा पनि चासो नदिएर आफ्नो कामकारबाही अगाडि बढाएपछि जवाफ माग गर्दै आफहरुले संसद बैठक चल्न नदिएको उनीहरुले बताए । 

जवाफ नआएसम्म बैठक अवरुद्ध गर्ने उनीहरुको अडान छ । त्यसपछि सभामुख मण्डलले १० मिनेटका लागि बैठक स्थगित गरेको बैठक एक घण्टा बित्न लाग्न समेत चल्न सकेको छैन । याे प्रदेशमा एमाले प्रमुख प्रतिपक्षमा छ ।