बाँकेमा स्कूल बस पल्टिँदा एक विद्यार्थीको मृत्यु, बैतडीको ट्याक्टर दुर्घटनामा ३ घाइते

३० असोज, काठमाडौं । बाँकेमा भएको विद्यालय बस दुर्घटनाबाट एक विद्यार्थीको मृत्यु भएको छ । जिल्लाको खजुरा गाउँपालिकामा एक स्कुलको बस पल्टिँदा दीपक बोर्डिङ स्कुलमा अध्ययनरत सोही गाउँपालिका–६ का १२ वर्षीय ऐसब नेपालीको मृत्यु भएको हो । 

सोमबार साँझ विद्यायलबाट घर पुर्‍याउने क्रममा खजुराबाट सिमलघारीतर्फ जाँदै गरेको ना ४ ख ६५१ नम्बरको बसको स्टेरिङ फेल भएर पुलबाट पल्टिएको थियो । पल्टिँदा ३० विद्यार्थी घाइते भएका छन् । बसमा करिब ४० जना विद्यार्थी सवार थिए ।

यस्तै, बैतडीमा ट्याक्टर दुर्घटना हुँदा चालकसहित ३ जना घाइते भएका छन् । मंगलबार बिहान जिल्लाको मेलौली नगरपालिका–१ स्थित मेलौली भगवती मन्दिर नजिकै म १ त ७४० नम्बरको ट्याक्टर दुर्घटना भएको हो । 

घाइते हुनेमा ट्याक्टर चालक कैलालीको मुसुरियाका नारायण चौधरी, कैलालीको घोडाघोडीका भुवन थापा र बैतडीको दोगडाकेदारका गगनसिंह कार्की रहेका छन् । 

ट्याक्टर मन्दिरको गेट निर्माणका लागि निर्माण सामग्री बोकेर गइरहेको बेला उकालोमा पल्टिएको थियो । घाइते तीनै जनाको केशरपुर प्राथमिक स्वास्थ्य केन्द्र मेलौलीमा उपचार भइरहेको बैतडी जिल्ला प्रहरी कार्यालयले जनाएको छ ।