गैरआवासीय नेपालीलाई नागरिकता दिनु राष्ट्रघात हाे, प्रतिवाद गराैं : प्रभु साह

३० असोज, काठमाडौं । संघीय सांसद एवं आम जनता पार्टी (आजपा)का अध्यक्ष प्रभु साहले गैरआवासीय नेपाली (एनआरएन)लाई नागरिकता दिनु राष्ट्रघाती कदम भएको बताएका छन् । उनले नागरिकता वितरणबाट राष्ट्रघातको नयाँ श्रंखला सुरु भएको बताए । 

संविधानमा व्यवस्था भएबमोजिम सरकारले आजदेखि एनआरएनलाई नागरिक दिन सुरु गरेको छ । आजै मात्र काठमाडौंमा एनआरएनएको विश्व सम्मेलन सुरु भएको छ । सो अवसरमा प्रधानमन्त्री प्रचण्डले आफ्नो सरकारी निवास बालुवाटारमा आयोजित एक कार्यक्रममार्फत नागरिकता वितरण गरेका छन् । सम्मेलनको उद्घाटन राष्ट्रपति रामचन्द्र पौडेलले गरेका छन् । नयाँ कार्यसमिति चयनका लागि भइरहेको सम्मेलनमा ५९ मुलुकबाट करिब ४ हजार एनआरएन सहभागी हुने आयोजक पक्षले जनाएको छ । 

सम्मेलनको तामझाम भइरहेका बेला कानून बनाउने जिम्मेवारी समेत बोकेका सांसद साहले आजै सामाजिक संजालमार्फत सन्देश दिँदै एनआरएनलाई नागरिकता वितरणले गरेर सरकारले राष्ट्रघाती कदम चालेको बताएका छन् । 

‘गैरआवासीय नागरिकता वितरण राष्ट्रघाती कार्यको शुरूवात हो । विदेशी नागरिकलाई नेपाली नागरिकता दिने कार्य खुलेआम राष्ट्रघाती कार्य हो’ साहले सामाजिक सञ्जालमा लेखेका छन् । उनले विदेशको नागरिक लिइसकेकालाई नेपाली नागरिकता दिनु नेपालभित्र रहेको उनीहरुको सम्पत्ति र लुटेर थुपारिएको धन विदेश लैजाने राष्ट्रघाती बाटो खुला गरिदिएको उल्लेख गरेका छन् । प्रम प्रचण्डले नागरिकता प्रदान गरेकाे तस्बीर राखेर सन्देश लेख्दै साहले दोहोरो नागरिकता वितरणलाई राष्ट्रघाती र अपराधजन्य कार्यको संज्ञा दिएका छन् । 

उनले लेखेका छन्,  ‘खर्बौं खर्बको चल सम्पति अवैध ढंगले विदेश पुर्‍याइसकेका तिनिहरुले अब आफनो अचल सम्पत्ति पनि खुलेआम विदेश लान पाउनेछन् । नेपालमा लुटेर राखेका सम्पति समेत विदेश लैजानलाई अब कानुनी समस्या हुने छैन ।’ दुनियाँमा काही नभएको दोहोरो नागरिकताको प्रावधानले नेपाल छिटै खोक्रो बनाउने उनको भनाइ छ । नागरिकता वितरण कार्यप्रति आक्रोश व्यक्त गर्दै यसको प्रतिवाद गर्न समेत अपिल गरेका छन् । 

 ‘विदेशी लगानी नेपाल ल्याउनलाई यो दोहोरो नागरिकताको प्रावधान ल्याइएको भन्ने हल्ला मच्चाएर आज ठुलो राष्ट्रघाती कार्य हुँदैछ । यस अपराधजन्य कार्यको विरुद्ध एक भएर प्रतिवाद गरौँ । राष्ट्रघाती कार्य मुर्दावाद, प्रतिक्रान्तिकारीहरु होशियार ।’