झलनाथ खनालको नजरमा मुलुकका मुख्य ४ संकट केके हुन् ?

३० असोज, काठमाडौं । पूर्वप्रधानमन्त्री एवं नेकपा एकीकृत समाजवादीकानेता झलनाथ खनालले मुलुकमा मुख्य चार संकट रहेका र यसलाई समाधान गर्न सबै राजनीतिक दल एक ठाउँमा उभिुनपर्ने बताएका छन् । 

दशैं, तिहार, छठ, नेपाल संवत्, ल्सोसार, उधौली लगायत चाडपर्वको अवसरमा शुभकामना सन्देश दिँदै उनले हाल अनेकन संकट कायम रहेपनि चार वटा संकटलाई मुख्य रुपमा उठाएका छन् । राजनीतिक, आर्थिक, सामाजिक र सांस्कृतिक संकट नै मुलुकका मुख्य संकट रहेको यसैकारण, राष्ट्रियताको संकट पैदा भएको भिडियो सन्देशमार्फत जिकिर गरेका छन् । उनले सन्देशमा नेपालीहरुको अग्रगमन र प्रगतिको कामना गरेका छन् । 

‘हाम्रो देश यति बेला विभिन्न कारणले अनेक खालका संकटहरुबाट अगाडि बढिरहेको छ । ‘राजनीतिक संकट, आर्थिक संकट, सामाजिक र सांस्कृतिक संकट, राष्ट्रियताको संकट सबै बढिरहेको छ’, उनले भनेका छन् । 

बजार भाउ महंगीका कारण  श्रमिक जनतामा चाडपर्वहरु कसरी मनाउने भन्ने चिन्ता बाक्लो बन्दै गइरहेको बताउँदै यसका मुख्य कारण दलाल पुँजीवादी व्यवस्था रहेको जिकिर गरेका छन् । 

समाजवादी मोर्चातर्फ संकेत गर्दै उनले समाजवादी समाज निर्माण गर्नका लागि प्रयत्न भइरहेको बताए । ‘‘एक दिन हामी एउटा सुन्दर, सभ्य, समृद्ध समाजवादी समाजमा पुग्नेछौं । र साँच्चै नै सबैको खुसियालीका निम्ति सम्पूर्ण पर्वहरु नयाँ ढंगले मनाउने छौं । तर, अहिले हामी जे अवस्थामा छौं त्यही अवस्थामा चाडपर्वहरु मनाउनुपर्ने आवश्यकता छ । म सबैलाई चाडपर्वहरुको अवसरमा हार्दिक मंगलमय शुभकामना व्यक्त गर्न चाहन्छु ।’