सांसद प्रभु साहकी पत्नी रिनाकुमारी मेयर पदबाट मुक्त, उपचुनावबाट पदपूर्ति गरिने

३० असोज, काठमाडौं । आम जनता पार्टी (आजपा)का अध्यक्ष समेत रहेका संघीय सांसद प्रभु साहकी पत्नी रिनाकुमारी साहको मेयर पुद गुमेको छ । रिनाकुमारी आजपाकी केन्द्रीय नेता समेत छिन् । उनी रौतहटको मौलापुर नगरपालिकाका मेयर थिइन् । उनीहरु एमालेबाट निर्वाचित भएपनि एमाले छाडेर पति नेतृत्वको आजपा रोजेपछि मेयर पदबाट मुक्त भएकी हुन् । 

निर्वाचन आयोगले आज एक सूचना प्रकाशित गर्दै राजनीति दलसम्बन्धी नियमावली २०७४ को नियम २२ को उपनियम २ बमोजिम रिनाकुमारी मेयर पदबाट मुक्त भई र उक्त पद रिक्त जानकारी दिएको छ । 
आयोगले दल त्याग सम्बन्धी ऐन बमोजिम एमालेबाट निर्वाचित मेयर साह अन्य दलमा प्रवेश गरेको भनी सो पार्टीले गरेको निर्णयबमोजिम मेयर साहको निर्वाचित भएको पद स्वतः रिक्त भएको व्यवहोरा सूचनामा उल्लेख गरेको छ । 

२०७४ को स्थानीय चुनावमा माओवादी केन्द्रबाट सोही नगरपालिका मेयरमा जितेकी उनी २०७९ वैशाखको निर्वाचनमा एमालेबाट निर्वाचित भएकी थिइन् । पछि २०७९ को मंसिर ४ मा सम्पन्न आम निर्वाचनबाट पति प्रभु साह एमालेले टिकट नदिएपछि स्वतन्त्र उठेर रौतहट क्षेत्र नं. ३ बाट संघीय सांसद विजयी भए । विजयीपछि उनले आफ्नै नेतृत्वमा आजपा गठन गरी निर्वाचन आयोगमा दर्ता गराएका थिए । पति प्रभु साहले एमाले छाडेर आम जनता पार्टी खोलेपछि पार्टीको सम्पर्कमा थिइनन् । उनलाई पटकपटक स्पष्टीकरण सोध्दा पनि जवाफ नदिएपछि एमालेले कारबाही गरेर निष्कासन पार्टीबाट गरेको थियो । कारवाहीको पत्र एमालेले आयोगलाई पठाएपछि आयोग प्रक्रियाबामोजिम कारवाही अगाडि बढाएको हो । 

रिक्त उक्त पदमा उपचुनावबाट पूर्ति गर्ने तयारीमा आयोग जुटेको छ । सोही प्रयोजनका लागि सूचना प्रकाशित गरिएको आयोगनिकट सूत्रले जनायो । कुनैपनि तहका जनप्रतिनिधिको कार्यकाल ६ महिना पूरा बाँकी रहँदा उपचुनावबाट पद पूर्ति गर्नुपर्ने कानूनी व्यवस्था छ ।