एनआरएनए अध्यक्षमा ४ जनाको उम्मेदवारी दर्ता

३० असोज, काठमाडौं । गैरआवासीय नेपाली (एनआरएन)हरुको छाता संगठन गैरआवासीय नेपाली संघ (एनआरएनए)को ११ औं विश्व सम्मेलनमा नयाँ नेतृत्वका लागि ४ जनाले उम्मेदवारी दर्ता गराएका छन् ।

आज काठमाडौंमा सुरू भएको सम्मेलनमा बद्री केसी, महेशकुमार श्रेष्ठ, रबिना थापा र राजेन्द्रकुमार शर्माले उम्मेदवारी दर्ता गराएको निर्वाचन समितिले जनाएको छ । केसी रसिया, श्रेष्ठ जापान, थापा अमेरिका र शर्मा कतारबाट प्रतिनिधित्व गर्दछन् । राजनीतिक रुपमा केसी एमाले, महेश कांग्रेस र शर्मालाई माओवादी केन्द्रको साथ रहेको ठानिएको छ ।

सम्मेलनले एनआरएनएमा ६ खुल्लासहित ८ उपाध्यक्ष, एक महासचिव, २ उपमहासचिव ७ सचिव, एक कोषाध्यक्ष, चार संयुक्त कोषाध्यक्षसहित ७४ सदस्यीय नयाँ कार्यसमिति चयन गर्नेछ । सम्मेलन ३ दिनसम्म चल्नेछ । सम्मेलनमा ५९ देशका ४ हजारभन्दा बढी प्रतिनिधिहरुले मतदान गर्ने जनाइएको छ । सम्मेलनको उद्घाटन राष्ट्रपति रामचन्द्र पौडेलले गरेका हुन् । समापन प्रधानमन्त्री प्रचण्डबाट गरिने जनाइएको छ । आजै मात्र नेपाल सरकारले एनआरएनलाई नेपाली नागरिकता समेत वितरण गर्न सुरु गरेको छ । जसकाे विराेध राजनीतिक दलबाटै सुरू भएकाे छ ।

६ खुल्ला उपाध्यक्षका लागि १८ जना र एक महासचिवका लागि २ जनाले उम्मेदवारी दर्ता गराएका छन् । २ उपमहासचिवका लागि ५ जना र ६ सचिवका लागि १५ जनाले मनोनयन दर्ता गराएका छन् । यस्तै कोषाध्यक्षका लागि सुदनकुमार थापा र ठाकुरप्रसाद ढुंगानाको उम्मेदवारी परेको छ ।

पहिलोपटक एनआरएनमा फेसियलभेरिफिकेसनको माध्यमबाट अनलाइन भोटिङ गरिने भएको छ ।