जस्तोसुकै मूल्य चुकाएर भएपनि विपिन जोशीलाई हमासबाट मुक्त गर्न सरकारसँग परिवारको आग्रह

३० असोज, काठमाडौं । कञ्चनपुरको किमदत्त नगरपालिका–३ का विपिन जोशीलाई प्यालेस्टाइन सशस्त्र समूह हमालसको कब्जाबाट मुक्त गर्न उनका परिवारले प्रधानमन्त्री प्रचण्डसँग आग्रह गरेका छन् । प्रधानमन्त्री प्रचण्डलाई ज्ञापनपत्र बुझाउँदै विपिनका बाबु महानन्द, आमा पदमा र बहिनी पुष्पा जोशीले यस्तो आग्रह गरेका हुन् । 

उनीहरुले आशा र भरोसाका केन्द्र नै प्रधानमन्त्री भएको उल्लेख गर्दै जस्तोसुकै मूल्य चुकाएर भएपनि विपिनलाई हमासबाट मुक्त गर्न जोडदार आग्रह गरेका छन् । उनीहरुले विपिन सुदूरपश्चिम विश्वविद्यालय अन्तर्गत कैलालीको टिकापुर बहुमुखी क्याम्पसमा कृषि संकायमा अध्ययनरत रहेका बेला ‘लर्न एण्ड अर्न’ कार्यक्रमका लागि गएको भदौ २६ मा इजरायल गएको र असोज २० गते हमास समूहले थाइ नागरिकसँगै अपहरण गरी कब्जामा लिएको विवरण घाइते भएर नेपाल फिर्ता भएका अन्य विद्यार्थीहरुबाट थाहा पाएको जनाएका छन् । 

क्याम्पसले ४९ नेपाली विद्यार्थीलाई इजरायल पुर्याएको र त्यस क्रममा युद्धग्रष्त क्षेत्र गाजामा राख्दै आइरहेको बेला हमासले बम र गोलीसहित आक्रमण गर्दा १० विद्यार्थीको मृत्यु भएको थियो । ४ जना घाइते भएका थिए । घाइतेमध्ये धनबहादुर चौधरी नेपाल घर आइसकेका छन् । विपिन अझै बेपत्ता छन् । परराष्ट्रमन्त्री एनपी साउदले विपिनको खोजीका लागि अन्तर्राष्ट्रिय समुदायसँग समेत अपिल गरिसकेका छन् ।

आक्रमणमा परी ज्यान गुमाएका नेपाली विद्यार्थीहरुको शव ल्याइसकेकाे छैन । सो आक्रमणमा अमेरिका, अजरबैजान, थाइ, भारत, इजरायल लागयत मुलुकका गरी सयौं मानिस मारिएका थिए ।

त्यसपछि सरकारले विमान चार्टर्ड गरेर २५४ नेपालीलाई उद्धार गरी गत हप्ता नेपाल ल्याइसकेको छ । थप १९ जनालाई आजै मात्र भारतीय विमानमार्फत भारत हुँदै नेपाल आइपुग्दैछन् । हमाल आक्रमणको विश्वभरबाट निन्दा र भत्सर्ना भइरहेको छ ।

आक्रमणपछि सरकारले इजराय जान सबैखाले अनुमति रोकेको छ ।