चुनौतीका बीच पनि नेपाल प्रहरी विश्वस्तरमा ख्याति प्राप्त छ : प्रधानमन्त्री प्रचण्ड

३० असोज, काठमाडौं ।  प्रधानमन्त्री पुष्पकमल दाहाल ‘प्रचण्ड’ ले आम नागरिक र सरकारको  हरेक समस्यामा नेपाल प्रहरीले प्रथम पंक्तिमा रहेर समस्याको सम्बोधन र समाधान गरेको बताएका छन् ।

मंगलबार ६८ औँ प्रहरी दिवसको उपलक्ष्यमा आयोजित कार्यक्रममा उनले सीमित साधन स्रोत, जनशक्ति र अनेकौं चुनौतीका बीच पनि अपराध नियन्त्रण र अनुसन्धानका क्षेत्रमा नेपाल प्रहरीले विश्व स्तरमा ख्याति प्राप्त गरेको बताए ।

उनले भने, ‘सीमित साधन स्रोत, जनशक्ति र अनेकौं चुनौतीका बीच पनि अपराध नियन्त्रण र अनुसन्धानका क्षेत्रमा नेपाल प्रहरीले विश्वस्तरमा जुन ख्याति प्राप्त गरेको छ, यो हाम्रा लागि महत्वपूर्ण पुँजी हो ।’

समाजमा बदलिँदो आपराधिक परिवेश, विश्वव्यापीकरणसँगै फैलिएको अन्तर्राष्ट्रिय अपराधको सञ्जाल, सूचना प्रविधिले ल्याएको विकास र यसले निम्त्याएको विनाश, अनुशासनहीनता सबै पक्षलाई मध्यनजर गरी नेपाल प्रहरीले आफ्नो स्वरूप र सेवा प्रवाहमा सोही अनुकूल विकास र परिवर्तन गर्दै गएको देख्दा गर्व लागेको उनको भनाई छ ।

उनले बदलिएको परिस्थिति अनुरूप आफूलाई रूपान्तरित र परिमार्जन गरेर मात्र हरेक संस्था, नेतृत्व र व्यक्तिले आफ्नो नेतृत्व क्षमता राम्रोसँग प्रमाणित गर्न सक्छ भन्ने एउटा जीवन्त उदाहरण नेपाल प्रहरी रहेको बताए ।  यस्तै संघीय प्रहरी ऐन ल्याउन सरकारले काम गरिरहेको र छिट्टै नै विधेयक संसदमा लैजाने र त्यसमा प्रहरी संगठनले साथ दिने विश्वास व्यक्त गरे । कर्तव्य पूरा गर्ने क्रममा ज्यान गुमाएका प्रहरीहरूप्रति श्रद्धाञ्जली व्यक्त गरे ।

कार्यक्रममा प्रधानमन्त्रीले हालै चीनमा सम्पन्न ओलम्पिक खेलमा राजत र कास्य पद जितेका खेलाडीहरूलाई सम्मानपत्र प्रदान गरेका थिए । साथै प्रहरीको लाइफ अचिभमेन्ट अवार्ड अवकाश प्राप्त प्रहरी निरीक्षक कोमलबहादुर थापालाई दिइयो ।

सो क्रममा प्रहरीका महानिरीक्षक (आईजी) बसन्तबहादुर कुँवरले प्रहरीले समाजले नै प्रहरीलाई अस्तित्वमा ल्याएको उल्लेख गर्दै नागरिकको ज्यान र धनको सुरक्षा, सार्वजनिक सम्पत्तिको सुरक्षा तथा अपराध नियन्त्रणका लाग कुनै पनि कसर बाँकी नराखी काम गरिरहेको बताए । संगठनमा आँच आउने काम गर्ने प्रहरीलाई कारवाही समेत गर्दै आइरहेको बताए ।

मानव बेचबिखन, तस्करी, अवैध हितयार ओसार पसार, अपराध नियन्त्रणमा प्रहरीको क्षमता विस्तार आवश्यक रहेको बताए । कानुनको परिपालनामा प्रहरी दृढसंकल्प रहेको उनले बताए । उनले प्रहरीलाई संघीय संरचनामा लैजान संगठनले आवश्यक काम गरिरहेकाे जानकारी समेत दिए ।