सेनाको भावी प्रधान सेनापतिमा ताराध्वज पाण्डे !

 

३० असोज, काठमाडौं । नेपाली सेनाको भावी प्रधान सेनापतिको करिब करिब टुंगो लागेको छ । नेपाली सेनाको युद्ध कार्य महानिर्देशनालयका प्रमुख उपरथी ताराध्वज पाण्डेलाई रथि पदका लागि बढुवा सिफारिस गरेपछि भावी प्रधानसेनापतिको टुंगो लागेको हो ।

सेनाको दोस्रो वरियतामा रहेका रथि सरोजप्रताप राणा अनिवार्य अवकाशका लागि आइतबारदेखि विदामा बसेपछि सैनिक मुख्यालयले उपरथि पाण्डेलाई रथी पद बढुवाका लागि सिफारिस गरेको हो । पाण्डे रथीमा बढुवा सिफारिस भएसंगै उनी हालका प्रधानसेनापति प्रभुराम शर्मापछि प्रधानसेनापति बन्ने लाइनमा पुगेका छन् ।

नेपाली सेनाले जारी गरेको बढुवा सिफारिससम्बन्धी ७ दिने सूचनामा सैनिक सेवा नियमावली २०६९ को परिच्छेद ३ मा रहेको सरुवा तथा बढुवासम्बन्धी व्यवस्था बमोजिम नेपाली सेनाको सैनिक साधारण सेवातर्फ रिक्त हुन आएको तीन तारे जर्नेल (रथी) मा बढुवा सिफारिसको लागि उनलाई सिफारिस गरिएको उल्लेख छ ।

सेनामा राणासंगै अर्का रथी सिताराम खड्कापनि उमेर हदका कारण आगामी पुस ३ मा अवकासमा जांदैछन् ।नेपाली सेनामा राणाको पदावधि थपको चर्चा चलेपनि राणाको पदावधि भने थप भएन् । उनि २०७८ कात्तिक ११ मा सेनाको रथीमा बढुवा भएका थिए । चीनबाट एनडिसी कोर्स गरेका पाण्डे यसअघि सेनाको इन्टेलिजेन्स व्यूरो प्रमुख थिए ।