काठमाडौंका यी सडक आजदेखि एकतर्फी बनाइयो

१ कात्तिक, काठमाडौं । आजदेखि काठमाडौं महानगरपालिका भित्रका ३ वटा सडक एकतर्फी सञ्चालन हुने भएका छन् । ट्राफिक व्यवस्थापन मिलाएर ती सडक एकतर्फी बनाइएको हो । काठमाडौं महानगरपालिकाका अनुसार कमलादी मोडबाट प्रज्ञा भवन हुँदै घण्टाघर निस्किने सडक र दरबारमार्गस्थित महेन्द्र शालिकबाट कृष्ण पाउरोटी चोकभन्दा तल पुग्ने सडक एकतर्फी भएका छन् । 

सडक एकतर्फी बनाइएको जानकारी दिन ती सडक क्षेत्रमा ट्राफिक प्रहरी र महानगरपालिकाका १०–१० जनाको टोली खटाइएको ट्राफिक प्रहरीले जनाएको छ । त्रिपुरेश्वर तर्फबाट काठमाडौं–ललितपुर जोड्ने सेतोपुल (नयाँ पुल) हुँदै गुसिंगाल निस्किने सडक एकतर्फी बनाइएको छ । अब त्रिपुरेश्वरतिरबाट प्रवेश गरेपनि ललितपुर तर्फबाट भने त्रिपुरेश्वरतिर आउँदा नयाँ पुल कटेर वायाँतर्फ मोडिएर आउनुपर्ने छ । त्रिपुरेश्वरबाट ललितपुरतिर जाँदा मिलन टोल, नयाँ पुल हुँदै जानुपर्ने छ । 

यसै गरी जमल र दरबारमार्गबाट रत्नपार्कतर्फ आउँदा त्रिचन्द्र क्याम्पस अगाडिबाट बायाँ मोडिएर गणेशस्थान, प्रज्ञा भवन हुँदै कमलादी मोडतर्फ आउन पाइने छैन र पुतलीसडकबाट काठमाडौं प्लाजा हुँदै हात्तीसार तर्फको सडक खण्डमा अब काठमाडौं प्लाजाबाट वायाँ मोडिएर महेन्द्र शालिक तर्फ जान पाइने छैन ।