ग्लोबल आईएमई बैंकको विश्वसनीयतामाथि प्रश्नः पैसा एउटाको, म्यासेज अर्कैलाई

१ कात्तिक, दमक । बैंक तथा वित्तीय संस्थाहरू व्यक्तिगत सम्पति बचतका लागि भरपर्दो भनेर नै जनताले आफूले दुःख गरेर कमाएको पैसा बैंकमा लगेर जम्मा गर्छन । जनताको निक्षेप सुरक्षित गर्नुपर्ने दायित्व बैंकको हो । तर, समय समयमा बैंकको सामान्य लापरबाहीले गर्दा निक्षेपकर्ताहरु ठगिने गरेका धेरै उदाहरणहरू छन् । 

बुधबार कार्यालय समयमा ग्लोबल आईएमई बैंकमा पनि यस्तै घटना घटेको छ । बैंकमा खाता नै नभएको व्यक्तिको म्यासेन्जरमा तपाईको स्यालरी भन्दै म्यासेज आएको छ । केहीबेरमा उक्त खाताबाट ८० हजार रकम निकालिएको म्यासेज पनि सोही व्यक्तिलाई गएको छ । खाता कस्को हो र रकम राखेको म्यासेज कसरी ट्रान्सफर भयो भन्ने बैंकले पनि जानकारी गराएको छैन । 

बुधबार दशैँको खर्च जुटाउने ध्याउन्नमा रहेका प्रदेश नम्बर एकको दमक निवासी यज्ञप्रसाद भट्टराईको मोबाइलमा एक्कासी पैसा जम्मा भएको म्यासेज आयो । भट्टराईले भने, "आफू पैसा खोजिरहेको अवस्थामा बैंक खातामा रकम जम्मा भएको म्यासेज आयो तर, मेरो उक्त बैंकमा बैंक खाता नै छैन ।" 

उनले नेपालबहससँग भने ‘एक्कासी मेरो मोबाईलमा ग्लोबल आईएमई बैंकबाट आज १२ बजेर १६ मिनेट जाँदा तलब बापत भन्दै ८ लाख ५८ हजार ७९० रूपैयाँ जम्मा भएको म्यासेज आयो । कहाँ र कसरी पैसा आयो भनेर खोजी भइरहँदा १ बजेर ८ मिनेट जाँदा फेरि कसैले ८० हजार झिकेको मेसेज आयो । म छक्क परे ।’ यसरी सम्पत्ति सुरक्षित र भरपर्दो रुपमा राख्ने विश्वासिलो माध्यम भनेको बैंकमा पनि यस्तो लापरबाही भएपछि कसको विश्वास गर्ने  ? उनले भने ।

एउटा व्यक्तिको खाताको रकम अर्को व्यक्तिको खातामा झुक्किएर पोष्टिङ हुनु सामान्य गल्ती होइन । यो घटनाले बैंक तथा वित्तीय संस्थाको विश्वसनियतामाथि गम्भीर प्रश्न उठाएको छ । अझै खाता नै नभएको व्यक्तिकाे मोबाइल म्यासेजमा लाखौं रकम तलब भन्दै जम्मा हुनु किमार्थ सामान्य मान्न सकिँदैन । बैंक तथा वित्तीय कारोबार गर्ने संस्थाहरुबाट यस्ता कमजोरी हुँदा जनतामा विश्वास घट्दै जाने कुरालाई बल पुर्याएको छ ।