चिनियाँ सेना काठमाडौंमा, सैन्य सहयोगबारे छलफल हुँदै

१ कात्तिक, काठमाडौं । दशैंको सम्मुखमा चिनियाँ सेनाको एउटा टोली नेपाल भ्रमणमा आएको छ । प्रधान सेनापति प्रभुराम शर्माको चीन भ्रमणको मिति तय भइसकेको अवस्थामा चिनियाँ जनमुक्ति सेनाको एउटा उच्चस्तरीय टोली काठमाडौं आइपुगेको हो । सो टोली एअर चाइनाको उडान नम्बर सीए ४ ३७ मा बुधबार दिउँसो काठमाडौं आइपुगेको हो । 

जनसेनाका कर्नेल तथा चिनियाँ सेनाको मुख्यालयस्थित स्टाफ विभागका उपनिर्देशक हुवाङ यानहुई नेतृत्वको टोलीमा अन्य तीन जना सैनिक अधिकृत छन् ।  नेपाल आएको टोलीमा कर्नेल याङ ले,कर्नेल फाङ सिआङ,सेकेण्ड लेफ्टिनेन्ट लोङ चेनसेङयु पनि रहेको सैनिक स्रोतले जनाएको छ ।

गत साउनमा पनि चीनको तिब्बत मिलिट्री कमाण्डको मेजर जनरल यु एन दे नेतृत्वको टोली नेपाल आएको थियो । त्यति बेला आएको टोलीले सैन्य सम्बन्ध, सीमा सुरक्षा लगायतका विषयमा छलफल गरेको थियो ।

अहिले आएको टोलीले पनि नेपाली सेनासँग आन्तरिक सम्बन्ध विस्तार, सैन्य सामग्रीको सहयोग लगायतका विषयमा छलफल गर्ने बताइएको भएपनि चिनिया सेना आएको विषयलाई नेपाली सेनाले गोप्य राखेको छ ।