साउदी अरेबियालाई हराउँदै नेपाल सेमिफाइनलमा

२ कात्तिक, काठमाडौं । नेपाल एसीसी यु १९ प्रिमियर कप क्रिकेटको सेमिफाइनलमा पुगेको छ । नेपालले बिहीबार समूहचरणको आफ्नो अन्तिम खेलमा साउदी अरेबियालाई ३ सय १ रनले पराजित गर्दै सेमिफाइनलमा प्रवेश गरेको हो । 

नेपालले यसअघिका दुई खेलमा बहराइन र इरानलाई पराजित गरेको थियो । नेपालले समूह ‘डी’ को विजेतासँग निर्णायक खेल खेल्ने छ । समूह ‘डी’ मा शुक्रबार हङकङ र जापान तथा मलेसिया र इन्डोनेसिया निर्णायक खेल खेल्दै छन् ।

मलेसियामा भइरहेको प्रतियोगितामा टस हारेको नेपालले निर्धारित ५० ओभर खेल्दै ८ विकेट गुमाई ३ सय ४७ रन बनायो । जवाफमा आएको साउदी अरेबिया १९.१ ओभरमा ४६ रनमा अलआउट भए । सर्वानन मुदालिएरले ११ रन बनाउनु बाहेक अन्यले दोहोरो स्कोर बनाउन सकेनन् । अन्तिम ब्याटर घायोर अहमदले अविजित ९ रन बनाए ।

दीपेश कँडेलले नेपालबाट पुनः ६ विकेट लिए । अघिल्लो खेलमा बहराइनविरुद्ध पनि ६ विकेट लएका उनले ९.१ ओभरमा १८ रनमात्र खर्चेका थिए । आकाश चन्दले २ र सुवास भण्डारीले १ विकेट लिए । बांगीस्थित वाइएसडी युकेएम ओभलमा अर्जुनको १ सय ४२ रनमा नेपालले विशाल योगफल बनाएको हो । 

ओपनर दीपक बोहरा २९ रनमा आउट भएपछि अर्जुनले आकाश त्रिपाठीसँग दोस्रो विकेटमा १ सय ८९ रनको साझेदारी गरेका थिए । अर्जुनले १ सय ११ बलको इनिङ्समा कुल १७ चौका र २ छक्का प्रहार गरे । आकाशले ९८ बलमा ८९ रन बनाए । उनले ६ चौका र २ छक्का प्रहार गरे । कप्तान देव खनाल दुई बल खेली शून्यमा आउट भए ।

दीपक डुम्रे १४, मिलन बोहरा ९ र दीपेश कँडेल १४ रनमा आउट भए । साउदी अरेबियाका अहमद राजा र घायेर अहमदले २÷२ विकेट लिए ।