कात्तिक ११ गते चियापानका लागि कांग्रेसको निम्तो

२ कात्तिक, काठमाडौं । नेपाली कांग्रेसले कात्तिक ११ गते चियापान कार्यक्रम गर्ने भएको छ । सधैं झैँ यस वर्ष पनि चियापान तथा शुभकामना आदानप्रदान कार्यक्रम राखिएको भन्दै कांग्रेसले बिहीबार विज्ञप्ति जारी गर्दै सबैलाई उपस्थितिका लागि आग्रह गरेको छ ।
 
वि.सं. २०३३ सालमा जननायक बीपी कोइराला राष्ट्रिय एकता तथा मेलमिलापको नीति लिई स्वदेश फर्केपछि प्रत्येक वर्ष नेपाली कांग्रेसले कोजाग्रत पूर्णिमाको दिनमा चियापान समारोह गरी शुभकामना आदान–प्रदान गर्ने परम्परा रहँदै आएको छ ।

कांग्रेसले यस वर्ष पनि निरन्तरता दिँदै विजया दशमी, तिहार, नेपाल सम्वत्, छठ लगायत पर्वहरूको अवसरमा २०८० कात्तिक ११ गते शनिबार कोजाग्रत पूर्णिमाको दिन दिउँसो १ बजेदेखि साँझ ५ बजेसम्म पार्टीको केन्द्रीय कार्यालय बी.पी. स्मृति भवन बी.पी. नगर, ललितपुरमा चियापान समारोह तथा शुभकामना आदान प्रदान कार्यक्रम राखिएको जनाएको छ । 

उक्त कार्यक्रममा विभिन्न राजनीतिक दलका नेताहरू, नेपाल सरकार मन्त्री परिषदका सदस्यहरू, संवैधानिक निकायका प्रमुखहरु, माननीय सांसदहरु, राष्ट्रसेवक कर्मचारीहरू, सुरक्षा निकायका प्रमुखहरु, कूटनीतिक नियोगका प्रमुखहरु, लेखक, साहित्यकार, कलाकार, उद्योगपति एवं व्यवसायीहरू, पेशागत एवं बुद्धिजीवीहरुलाई बोलाएको छ । 

यसै गरी नागरिक समाजका अगुवाहरु, मानव अधिकारकर्मीहरू, विभिन्न सञ्चार माध्यमका प्रमुखहरु, पत्रकारहरू, गैर–आवासीय नेपालीहरूको संघ–संस्थाका प्रमुखहरु लगायतका विशिष्ट महानुभावहरू, नेपाली कांग्रेसका सदस्यहरू एवं शुभेच्छुकहरूको सहभागिता हुने भएकोले उक्त दिन शुभकामना आदान–प्रदान गर्दै चियापानका साथ समाचार संकलन तथा प्रसारणार्थ उपस्थितिका लागि हार्दिक आमन्त्रण गरिन्छ, कांग्रेसको विज्ञप्‍तिमा भनिएको छ ।