हत्या आरोपमा दुईजना भारतीय पक्राउ

१० कात्तिक, महोत्तरी । नेपाली नागरिकको हत्या गरेको आरोपमा दुईजना भारतीय नागरिक पक्राउ परेका छन् । महोत्तरी जिल्लाको पिपरा गाउँपालिका–५ हर्दिया गाउँमा रु ५० को सिक्रीका लागि बिहीबार एक युवकको हत्या भएको थियो । भारतको मधुवनी जिल्ला साहरघाटनिवासी १९ वर्षीय दीपक मल्लिक र सोही ठाउँ निवासी १८ वर्षीय अमित मल्लिकलाई पक्राउ गरिएको जिल्ला प्रहरी कार्यालय महोत्तरीका प्रवक्ता डिएसपी दिलीपकुमार गिरिले जानकारी दिए ।

कात्तिक ९ गते बेलुका महोत्तरीको पिपरा गाउँपालिका– ५ हरदिया टोल बस्ने राजनारायण पासमानको १९ वर्षीय छोरा आशिक पासमान मृत भेटिएका थिए ।  जिल्ला प्रहरी कार्यालय महोत्तरीका प्रवक्ता प्रहरी नायब उपरीक्षक दिलीपकुमार गिरीका अनुसार स्थानीय राजनारायण पासवानका छोरा १९ वर्षीय आशिक भन्ने वसन्त पासवानको आफ्नै दुईजना साथीले छुरा हानेर हत्या गरेका हुन् ।
    
बुधबार राति गाउँमै लागेको दसैँ मेला हेर्न गएका वसन्तले मेलामा रु ५० मा एउटा सिक्री किनेका थिए । सोही सिक्री लगाएर फोटो खिच्ने भन्दै उनीसँगै गएका साथी दीपक मल्लिकले वसन्तको सिक्री लिएर फोटो खिचेका थिए । तर फोटो खिचिसकेपछि वसन्तले आफ्नो सिक्री माग्दा दीपकले नदिएपछि झगडा भएको र पछि दीपक र अर्का साथी अमित मल्लिक मिलेर वसन्तलाई छुरा हानेका प्रहरीले जनाएको छ ।

जिल्ला प्रहरी कार्यालय महोत्तरीले आफ्नै साथीको हत्याको आरोपमा वसन्तका साथीहरु भारतको विहार राज्यको मधुवनी जिल्लाको जयनगर बस्ने १९ वर्षीय दीपक मल्लिक र उनका भाइ नाता पर्ने सोही जिल्लाको साहरघाट बसबरिया बस्ने १८ वर्षीय अमित मल्लिकलाई पक्राउ गरी जिल्ला प्रहरी कार्यालय महोत्तरीमा राखेको छ । 

पासमानको शव स्थानीय जगदीश साहको खेतमा फेला परेको थियो । आरोपी युवाहरू पिपरा गाउँपालिका– ५ स्थित आफ्नो मामा सुरेश मल्लिकको घरमा बस्दै आएका थिए । घाँटीमा लगाउने चेनको विषयमा विवाद हुँदा हत्या गरेको आरोपीले स्विकारेको प्रवक्ता गिरीले बताए ।  शव पोस्टमार्टमका लागि प्रादेशिक अस्पताल जनकपुरमा राखिएको छ । घटनाबारे थप अनुसन्धान भइरहेको प्रहरीले जनाएको छ ।