आज नेपाली कांग्रेसको चियापान

११ कात्तिक, काठमाडौं । आज नेपाली कांग्रेसले चियापानको आयोजना गर्दैछ । दशैं तिहारजस्ता नेपालीहरूको महान पर्वको अवसरमा नेपाली कांग्रेसले आज चियापानको आयोजना गर्न लागेको हो । 

सानेपास्थित केन्द्रीय कार्यालयमा आयोजना हुने उक्त चियापान कार्यक्रममा प्रधानमन्त्री, मन्त्री, राजनीतिक दलका प्रतिनिधि, संवैधानिक आयोगका प्रमुख र सदस्य तथा कूटनीतिक नियोगका प्रमुख लगायतका मुलुकका विभिन्न क्षेत्रका प्रतिनिधित्वहरुको उपस्थिति रहने कांग्रेसले जनाएको छ । 

कोजाग्रत पुर्णिमाको दिन हरेक बर्ष कांग्रेसले बर्षाै देखी चियापान आयोजना गर्दै आएको छ । चियापान दिउँसो २ बजेदेखि साँझ ५ बजेसम्म चल्ने कांग्रेसले जनाएको छ । 

कांग्रेसले वि.सं. २०३३ सालमा जननायक बी.पी. कोइराला राष्ट्रिय एकता तथा मेलमिलापको नीति लिएर स्वदेश फर्केपछि २०३४ सालदेखि प्रत्येक वर्ष कोजाग्रत पूर्णिमाको दिनमा चियापान कार्यक्रम गरी शुभकामना आदानप्रदान गर्दै आएको थियो । तर कोरोनाका कारण पछिल्ला तीन वर्ष निरन्तर त्यस्तो कार्यक्रम हुन पाएको थिएन ।

कांग्रेसका प्रचार विभाग प्रमुख मीन विश्वकर्माले पार्टीले २०३४ सालदेखि मनाउँदै आएको चियापान कार्यक्रमलाई यसवर्षदेखि पुनः निरन्तरता दिइएको बताए । चियापान समारोहमा कांग्रेसले विभिन्न राजनीतिक दलका नेता, मन्त्रीहरू, संवैधानिक निकायका प्रमुखहरू, सांसदहरू, राष्ट्रसेवक कर्मचारीहरू, सुरक्षा निकायका प्रमुखहरू, कूटनीतिक नियोगका प्रमुखहरू लगायतलाई आमन्त्रण गरेको छ ।