कांग्रेसको चियापानमा दलका नेताको बाक्लो उपस्थिति

११ कात्तिक, काठमाडौं । नेपाली कांग्रेसले चियापान पार्टी कार्यालय सानेपामा सुरु भएको छ । दशैं तिहारजस्ता नेपालीहरूको महान पर्वको अवसरमा नेपाली कांग्रेसले आज चियापानको आयोजना गरेको हो । चियापान समारोहमा निम्तालुलाई स्वागत गर्न कांग्रेस महामन्त्रीहरु खटिएर लागेका छन् । 

पार्टी सभापति शेरबहादुर देउवाले पनि आएका कांग्रेस नेता र अन्य पार्टीका पाहुनाहरुलाई स्वागत गरिरहेका छन् । सानेपास्थित केन्द्रीय कार्यालयमा आयोजना गरिएको चियापान कार्यक्रममा प्रधानमन्त्री, मन्त्री, राजनीतिक दलका प्रतिनिधि, संवैधानिक आयोगका प्रमुख र सदस्य तथा कूटनीतिक नियोगका प्रमुख लगायतका मुलुकका विभिन्न क्षेत्रका प्रतिनिधित्वहरुलाई निम्ता दिइएको छ । 

कोजाग्रत पुर्णिमाको दिन हरेक बर्ष कांग्रेसले बर्षाै देखी चियापान आयोजना गर्दै आएको छ । चियापान दिउँसो २ बजेदेखि साँझ ५ बजेसम्म चल्ने कांग्रेसले जनाएको छ । कांग्रेसले वि.सं. २०३३ सालमा जननायक बी.पी. कोइराला राष्ट्रिय एकता तथा मेलमिलापको नीति लिएर स्वदेश फर्केपछि २०३४ सालदेखि प्रत्येक वर्ष कोजाग्रत पूर्णिमाको दिनमा चियापान कार्यक्रम गरी शुभकामना आदानप्रदान गर्दै आएको थियो । तर कोरोनाका कारण पछिल्ला तीन वर्ष निरन्तर त्यस्तो कार्यक्रम हुन पाएको थिएन ।

कांग्रेसका प्रचार विभाग प्रमुख मीन विश्वकर्माले पार्टीले २०३४ सालदेखि मनाउँदै आएको चियापान कार्यक्रमलाई यसवर्षदेखि पुनः निरन्तरता दिइएको बताए । चियापान समारोहमा कांग्रेसले विभिन्न राजनीतिक दलका नेता, मन्त्रीहरू, संवैधानिक निकायका प्रमुखहरू, सांसदहरू, राष्ट्रसेवक कर्मचारीहरू, सुरक्षा निकायका प्रमुखहरू, कूटनीतिक नियोगका प्रमुखहरू लगायतलाई आमन्त्रण गरेको छ ।