कांग्रेसको चियापानमा ओलीसहित एमाले नेताहरु सहभागि

११ कात्तिक, काठमाडौं । नेपाली कांग्रेसले आयोजना गरेको चियापान तथा शुभकामना आदानप्रदान कार्यक्रममा एमाले नेताहरु पुगेका छन् । कांग्रेस सभापति देउवासँग उनीहरुले केहिबेर समसामयिक राजनीतिक विषयमा पनि कुराकानी गरेका छन् । अध्यक्ष ओलीले देउवासँग ठट्टा समेत गरेका थिए । 

शनिबार दिउँसो एमाले अध्यक्ष केपी शर्मा ओली, वरिष्ठ उपाध्यक्ष ईश्वर पोखरेल, उपाध्यक्ष विष्णु पौडेललगायतका नेताहरु कांग्रेस पार्टी कार्यालय सानेपा पुगेका थिए । एमाले नेताहरुलाई कांग्रेस सभापति शेरबहादुर देउवा, उपसभापति धनराज गुरुङ लगायतका नेताहरुले स्वागत गरेका थिए । 

दुई दलका नेताहरुबीच त्यस क्रममा हाँसो ठट्टा पनि भएको थियो । संसद्को सबैभन्दा ठूलो दल कांग्रेसका सभापति देउवा र एमाले अध्यक्ष ओलीले प्रमुख दलमाथि प्रश्न नउठाइएको तर, प्रश्न उठाउने प्रयास भने गरिएको बताए । 

कोजाग्रत पूर्णिमाका अवसरमा कांग्रेसले आयोजना गरेको शुभकामना आदानप्रदान कार्यक्रममा सहभागी हुन ओली करिब सवा २ बजे सानेपा पुगेका थिए । शुभकामना साटेर ओलीले बिदा लिने क्रममा सोधिएको प्रश्नमा दुवै नेताले प्रमुख दलमाथि प्रश्न उठाइएको नभएर उठाउने प्रयास मात्र गरिएको बताए ।
 
प्रमुख दलहरूमाथि प्रश्न उठाइँदै छ, तपाईंहरूको सामूहिक जवाफ के हो भन्ने प्रश्नमा देउवाले अहिले जवाफ दिने समय नभएको बताए । अहिले जवाफ दिने समय होइन, हामी उचित समयमा उचित जवाफ दिने नै छौँ, देउवाले भने, अहिले प्रश्न उठाउनेहरूलाई उठाउन दिनोस् ।