बाराका रुपेश सर्राफको हत्या आरोपमा १० जना पक्राउ

१४ कात्तिक, जनकपुरधाम । बाराको कलैयास्थित बाल एकता इङ्गलिस बोर्डिङ स्कुलका प्रिन्सिपल रुपेश सर्राफको हत्यामा संलग्न रहेको आशंकामा प्रहरीले एक महिलासहित १० जनालाई पक्राउ गरेको छ ।   पक्राउ परेका आरोपीलाई प्रहरीले पत्रकार सम्मेलन गरेर सार्वजनिक गर्ने तयारी छ ।

बारा कलैया उपमहानगरपालिका–६, का रुपेसमाथि सोमबार १ बजे कलैया बजारमै गोली प्रहार भएको थियो । उनको घाँटीमा दुई वटा गोली लागेको थियो । मोटरसाइकलमा रहेका उनी त्यहीँ ढलेका थिए । ढलेपछि पनि उनलाई थप गोली हानिएको प्रत्यक्षदर्शीले बताएका छन् । गोली लागेर घाइते भएका उनको अस्पताल पुर्याएलगत्तै डाक्टरले मृत घोषणा गरेको मधेस प्रहरी प्रमुख डीआईजी जनक भट्टराईले जानकारी दिए ।
 
रुपेशको हत्या लगत्तै प्रहरीको केन्द्रीय अनुसन्धान ब्यूरो सीआईबीले समेत घटनाबारे चासो राखेको थियो । गोली हानी हत्या गरिएका रुपेश ६० किलो सुन तस्करीमा पक्राउ परेका बाराकै सुनचाँदी व्यवसायी संघका अध्यक्ष शिवकुमार सर्राफका आफन्त हुन् । बारा प्रहरी प्रमुख एसपी सुरेश काफ्लेले भने घटनाको विभिन्न कोणबाट अनुसन्धान हुँदा महिला नै हत्याको मुख्य योजनाकार भएको पाइएको बताए ।

के कारणले हत्याको योजना बनाइएको हो भन्ने बारेमा पनि प्रहरीले पत्रकार सम्मेलन गरेर जानकारी दिने बताएको छ । काफ्लेका अनुसार यसअघि साउनमा पनि बारामै उनीमाथि गोली प्रहारको योजना बनेको थियो । त्यस बेला सो समूहबाट सर्राफ भाग्न सफल भएको अहिले अनुसन्धानका क्रममा पाइएको काफ्लेले बताए ।