विदेशमा भएका नेपालीलाई तत्काल नेपाल फर्काएर रोजगारी दिने अवस्था छैनः महामन्त्री शर्मा

१४ कात्तिक, काठमाडौं । नेपाली कांग्रेसका महामन्त्री विश्वप्रकाश शर्माले विदेशमा रहेका नेपालीलाई तत्काल नेपाल फर्काउन सकिने अवस्था नरहेको बताएका छन् । कसैले त्यस्तो भन्छ भने त्यो भावनात्मक र सस्तो लोकप्रियताको कुरामात्रै हुने उनको भनाइ छ । अमेरिकाको न्यूयोर्कमा भएको नेपालको आजको अवस्था र अबको बाटो विषयक सर्वपक्षीय अन्तरक्रियामा महामन्त्री शर्माले नेपालमा तत्काल अनिवार्य जनशक्तिबाहेकलाई बाह्य व्यवस्थापन गर्नुपर्ने बाध्यतात्मक परिस्थिति रहेको बताए ।

उनले भने, ‘विदेशमा रहेका नेपालीलाई नेपाल फर्क भन्ने अवस्था तत्काल छैन । त्यो भावनात्मक र सस्तो लोकप्रियताको कुरा मात्रै हुन जान्छ । जनसंख्याको विस्फोटक आकार व्यवस्थापन गर्न, देशमा अनिवार्य जनशक्ति बाहेकलाई बाह्य व्यवस्थापन अहिलेको बाध्यतात्मक स्थिति हो । अहिलेको प्राथमिकता जलविद्युत् उत्पादनमा वृद्धि र वैदेशिक रोजगारको मर्यादा अभिवृद्धि हो ।

उनले नेपाल सरकारले देशमा लगानी गर्ने वातावरण बनाउन र गैरआवासीय नागरिकहरुलाई लगानीका लागि प्रेरित गर्न सक्नुपर्ने बताए । ’संविधानको व्यवस्थाबमोजिम सरकारले गैरआवासीय नागरिकहरुलाई पनि नागरिकता दिन थालेको छ । अब देशमा लगानी गर्न गैरआवासीय नागरिकताको उपयोग बृहत्तर रूपमा गर्न जरुरी छ,’ शर्माको भनाइ थियो ।

महामन्त्री शर्माले नेपालमा हाल रहेको राजनीतिक व्यवस्थापमा परिमार्जन र अवस्थामा परिवर्तनका लागि सबैको साझा प्रयास र मेहनतको खाँचो रहेकोमा जोड दिएका थिए । नेपाली जनसम्पर्क समिति अमेरिकाले गरेको कार्यक्रममा वर्तमान नेपालको राजनैतिक, आर्थिक, सामाजिक लगायतका विविध विषयहरुमा केन्द्रित रहेर छलफल भएको थियो भने अमेरिकामा रहेका विभिन्न राजनीतिक दलका भ्रातृ संस्था र शुभेच्छुकहरुको सहभागिता रहेको थियो ।