आन्दोलन फिर्ता लिन कलेज प्रशासनको आग्रह

१४ कात्तिक, भैरहवा । भैरहवास्थित युनिभर्सल कलेज अफ मेडिकल साइन्सेस् प्रशासनले आन्दोलनरत विद्यार्थीलाई आन्दोलनका सम्पूर्ण कार्यक्रम फिर्ता लिइ शैक्षिक दिनचर्यामा फर्किन आग्रह गरेको छ । विद्यार्थी आन्दोलनले असोजको अन्तिम हप्तादेखि अस्तव्यस्त हुन पुगेको उक्त कलेज प्रशासनले सोमबार साँझ एक विज्ञप्ति जारी गर्दै उक्त आग्रह गरेको हो ।

विज्ञप्तिमा आन्दोलनको विषयलाई लिएर भोलिका दिनमा कुनैपनि विद्यार्थीमाथि कुनैपनि पूर्वाग्राही व्यवहार र मूल्यांकनमा भेदभाव नगर्ने प्रतिबद्धता व्यक्त गरिएको छ । कलेज प्रिन्सिपल प्रा डा लक्ष्मी पाठकको राजीनामासहित ७ बुँदे माग राख्दै उक्त कलेजका एमबीबीएस, बीडीएस र पीजी तहका विद्यार्थी गत असोज २२ गतेदेखि आन्दोलनरत छन् । 

कलेज प्रशासन र आन्दोलनरत विद्यार्थी समूहबिच अहिलेसम्म तीन चरणको वार्ता भएपनि कलेज प्रिन्सिपल पाठकले राजीनामा दिनु पर्ने वा उनलाई अन्यत्र स्थानान्तरण नगरिएसम्म कुनैपनि वार्ता स्वीकार्य नहुने अडान आन्दोलनरत विद्यार्थीले राख्दै आएकाले वार्ताले सार्थकता पाउन सकेको छैन ।