बहराइनसंँग हङकङ २० रनले पराजित

१४ कात्तिक, काठमाडौं । आईसीसी ट्वान्टी–२० विश्वकपको एसिया छनोटअन्तर्गतको समूह ’बी’ को खेलमा बहराइनले हङकङलाई पराजित गरेको छ । समूह ’बी’ मा बहराइनले जित हात पारेसँगै सेमिफाइनल समीकरण पनि रोचक बन्ने भएको छ । मंगलबारको खेल हङकङले जितेको भए सेमिफाइनल जाने सम्भावना प्रबल थियो । 

मंगलबार मूलपानी क्रिकेट मैदानमा १४७ रनको लक्ष्य पछ्याएको हङकङले १९.१ ओभरमा सबै विकेट गुमाउँदै १२६ रन मात्र बनाएको हो । हङकङका लागि अंशुमान रथले बनाएको २८ रन नै सर्वाधिक स्कोर रह्यो । त्यस्तै जीशन अलीले २१ रन बनाउँदा ऐजाज खानले १९ रन बनाए । कप्तान निजाकत खान भने ४ रनमै आउट भए ।

बहराइनका लागि अब्दुल मजिद किफायती बलिङ गरे । ३.१ ओभर बलिङ गरेका उनले ३ विकेट लिँदै ७ रन मात्र खर्चिए । त्यस्तै अलि दाउद र रिजवान बटले २÷२ विकेट लिँदा साथिया वीरपथिरान र इमरान अनवरले १÷१ विकेट लिए ।

त्यसअघि पहिले टस हारेर ब्याटिङको निम्तो पाएको बहराइनले १९.३ ओभरमा सबै विकेट गुमाएर १४६ रन बनाएको थियो । बहराइनका लागि इमरान अलीले ६२ रन बनाए । ४३ बलमा उनले ५ चौका र ३ छक्का प्रहार गरे । इमरान अनवरले १५ र हैदर बटले १४ रन बनाए ।

हङकङका लागि नसरुल्लाह रानाले ३ विकेट लिँदा ऐजाज खान, एहसान खान र यासिम मुर्तजाले २÷२ विकेट लिए । समूह ’बी’ मा यूएई, बहराइन र हङकङको समान २÷२ अंक भएको छ । रनरेटका आधारमा समूहको शीर्ष स्थानमा यूएई र त्यसपछि बहराइन रहेको छ ।

समूह ’ए’ मा रहेको नेपालले मंगलबार मलेसियाको सामना गर्दैछ । समूह ’ए’ मा रहेको ओमानले दुई खेल जितिसकेको छ । नेपालले सोमबार सिंगापुरलाई ८ विकेटले हराएको थियो । ओमानले भने मंगलबार सिंगापुरलाई २२ रनले हराएको हो ।