१६ वर्षका किशोरको झोलाबाट २१ लाख ८७ हजार बरामद

१४ कात्तिक, विराटनगर । मोरङ प्रहरीले विराटनगर–६ शनिमन्दिर चोकबाट स्रोत नखुलेको २१ लाख ८७ हजार रूपैयाँ मंगलबार नगद बरामद गरेको छ । कोशी प्रहरी कार्यालयका प्रादेशिक अनुसन्धान टोली र मोरङ प्रहरीको संयुक्त टोलीले १६ वर्षीय किशोरले कालो झोलामा उक्त रकम बोकेको अवस्थामा नियन्त्रणमा लिएको हो । 

जिल्ला प्रहरी मोरङका सूचना अधिकारी प्रहरी निरीक्षक हेमराज ओलीका अनुसार उनको साथबाट १ हजार दरको १ हजार ६८७ थान, ५ सय दरको १ हजार थान बरामद भएको हो । उक्त रकम हुण्डी कारोबारको भएको प्रारम्भिक अनुसन्धानबाट खुलेको छ । 

उनको साथबाट कुमारी बैंक लिमिटेडको चेकबुक एक थान, एनआईसी एसिया बैंकको एक थान चेक, ग्लोबल आईएमई बैंक लिमिटेडमा विभिन्न मितिमा रकम जम्मा गरेको भौचर चार थान र प्रदेश १–०२–०४३ प ६२४१ नम्बरको मोटरसाइकल बरामद भएको प्रहरीले बताएको छ ।