इलाम-२ को उपनिर्वाचन बैशाखमा र माघमा राष्ट्रियसभाका १९ पदको निर्वाचन गर्नुपर्छः प्रमुख आयुक्त

१५ कात्तिक, काठमाडौं । प्रमुख निर्वाचन आयुक्त दिनेश कुमार थपलियाले वैशाखमा उपनिर्वाचन गर्ने परामर्श आयोगले सरकारलाई दिएको बताएका छन् ।  उनले आयोगले निर्वाचनको तयारीलाई ध्यानमा राखेर सरकारलाई सुझाव दिएको बताएका छन् । 

राज्य व्यवस्था तथा सुशासन समितिको बुधबारको बैठकमा बोल्दै उनले उपनिर्वाचन वैशाखमा गर्दा उपयुक्त हुने परामर्श दिइएको बताए । हाल इलाम क्षेत्र नम्बर २ मा नेकपा एमाले सांसद सुवास नेम्वाङको निधन पश्चात् स्थान रिक्त छ ।

यस्तै, राष्ट्रिय सभा निर्वाचन पनि माघको १०, ११ र १२ मध्ये एक दिन गर्ने तयारीमा निर्वाचन अयोग रहेको उनले बताए । माघ १०, ११ र १२ मध्ये एक दिन गर्छौँ, समिति बैठकमा उनले भने । राष्ट्रिय सभामा फागुन २१ बाट १९ जनाको पद रिक्त हुँदै छ । 

राष्ट्रिय सभा सदस्यहरूको पद रिक्त हुने एक महिना अगाडि नै निर्वाचन गराउनुपर्ने संवैधानिक व्यवस्था छ । निर्वाचनको मितिबारे सरकारसँग परामर्श भइरहेको प्रमुख निर्वाचन आयुक्त थपलियाले जानकारी दिए । निर्वाचन आयोगसँगको परामर्शमा मन्त्रिपरिषद बैठकले अन्तिम निर्णय गर्दछ । राष्ट्रिय सभाका एक तिहाइ सदस्य हरेक दुई–दुई वर्षमा रिक्त हुने गर्दछन् ।