मिडियाले माओवादीको गलत प्रचार गरेः प्रधानमन्त्री

१५ कात्तिक, काठमाडौं । प्रधानमन्त्री पुष्पकमल दाहाल प्रचण्डले मिडियाले माओवादीको कू प्रचार गरेको आरोप लगाएका छन् । सरकारमा बसेर सडक प्रदर्शन गर्न लागेको भन्दै सवैतिर आलोचना भएपछि प्रधानमन्त्री पप्रचण्डले सञ्चार माध्यमले पार्टी निर्णयलाई गलत रुपमा प्रचार गरेको बताएका हुन् । 

प्रमुख प्रतिपक्षी दल नेकपा एमालेले आयोजना गरेको चियापान कार्यक्रम मा सञ्चारकार्मीहरुसँग पार्टीले वडास्तरमा गरेको जनपरिचालन कार्यक्रमलाई पालिका र प्रदेशस्तरमा गर्न खोजेको भन्दै सडक प्रदर्शनका बारेमा पार्टीले गरेको निर्णयको मिडियाले गलत प्रचार गरेको बताए ।

उनले भने, ’मिडियाले गलत ढंगले प्रचार गर्यो । अहिले देशभर वडास्तरमा जनपरिचालनका कार्यक्रमहरु चलिरहेको छ । जनपरिचालनलाई गाउँपालिका र काठमाडौंमा तीन वटा प्रदेशले एकै स्थानमा जनपरिचालन गर्न खोजेको हो । कसैका विरुद्ध कुनै प्रदर्शन गर्न खोजेको होइन ।’

माओवादी केन्द्रको मंगलबार बसेको बैठकले राजावादीहरु सक्रिय भएको भन्दै त्यसविरुद्ध सडक प्रदर्शन गर्ने निर्णय गरेका थिए । सरकारको नेतृत्व गर्ने र सडक प्रदर्शन पनि गर्ने भन्दै विभिन्न पक्षबाट माओवादी केन्द्रको आलोचना भएको थियो ।

प्रधानमन्त्री प्रचण्डले एमालेको चियापान कार्यक्रमले दलहरुबीच समझदारी बनाउन राम्रो वातावरण बनाएको बताए । अस्ती कांग्रेस र आज एमालेले गरेको चियापान कार्यक्रमले राजनीतिक पार्टीहरुबीच समझदारी बढाउन राम्रो वातावरण बनेको प्रधानमन्त्रीको भनाइ छ ।