संविधानबाट समानुपातिक निर्वाचन प्रणाली हटाउनुपर्छः कोइराला

१५ कात्तिक, काठमाडौं । नेपाली कांग्रेस वरिष्ठ नेता डा. शेखर कोइरालाले संविधानमा संशोधन गरेर समानुपातिक निर्वाचन प्रणाली हटाउनुपर्ने बताएका छन् । उनले प्रत्यक्षतर्फ नै सबै क्लष्टरहरूको प्रतिनिधित्व सुनिश्चित गर्ने व्यवस्था गर्नुपर्ने बताएका छन् ।

बुधबार कास्की क्षेत्र नं. १ मा कांग्रेसको क्षेत्रीय सम्मेलनमा बोल्दै आगामी निर्वाचनमा गठबन्धन गर्न नहुने भन्दै नेता कोइरालाले आगामी निर्वाचनमा गठबन्धन नगर्ने मनस्थिति बनाएर देशभरिबाट कार्यकर्ताहरूले अहिल्यैदेखि काम थाल्नुपर्ने बताए ।  

उनले भने, ‘समानुपातिक निर्वाचन प्रणालीलाई बिदा गरौँ । तर संविधानमा व्यवस्था गरिएको समावेशिताको मर्मलाई लागू गर्ने गरी क्लष्टरबाट उम्मेदवारी दिने व्यवस्था गरौँ । सबै प्रत्यक्ष निर्वाचित हुने व्यवस्था गरौँ । एक्लै चुनाव लडौँ । गठबन्धन नगरी चुनावमा जाऔँ । तपाईहरू अहिले देखि नै एक्लै चुनाव लड्नुपर्छ भनेर वडा–वडामा जानुहोस्, हामी आगामी निर्वाचनमा एक्लै लडौँ ।’

कोइरालाले व्यवहारवादी राजनीतिको नाउँमा कांग्रेसले सिद्धान्तहिन राजनीतिको बाटो समात्न खोजिरहेको बताए । उनले आफू भने सिद्धान्तहीन राजनीति गर्न नसक्ने बताए । नेता कोइरालाले पार्टीले बाटो बिराउन लाग्दा कोशीमा पार्टीको सिद्धान्तलाई केन्द्रमा राखेर एउटा फरक अभ्यास भएको दाबी गरे ।

व्यवहारबादी राजनीतिको नाउँमा नेपाली कांग्रेसले आफ्नो सिद्धान्तहरू छोड्दैछ । तर म छोड्दिनँ । म सिद्धान्तहीन राजनीति गर्न सक्दिनँ । कोशीमा पार्टीले सिद्धान्त छोड्न लाग्दा एउटा एक्पेरिमेन्ट भयो, कोइरालाले भने । नेता कोइरालाले पछिल्लो विकसित राजनीतिक घटनाबारे पार्टीमा सभापति शेरबहादुर देउवा र नेताहरूसँग संवाद भइरहेको बताए । 

‘सबैसँग कुरा भइरहेको छ । सभापतिजीसँग पनि अस्तिको दिनमात्रै भेट भयो । मेरो उहाँसँग पनि संवाद भइरहेको छ । उहाँ पार्टीको सभापति हो, हामीभन्दा सिनियर हो, उहाँलाई सम्मान नै गरेर अघि बढ्ने हो, उनले भने ।