जारी खेल जित्न नेपाललाई १४६ रनको मध्यम लक्ष्य

१६ कात्तिक, काठमाडौं । टी–२० विश्वकप एसिया छनोट फाइनलमा ओमानले नेपाललाई १४६ रनको लक्ष्य दिएको छ । नेपालले केहीबेरमा जवाफी ब्याटिङ गर्नेछ । नेपालले खेल जित्न ओमानले दिएको १ सय ४६ रनको लक्ष्य पार गर्नुपर्नेछ । नेपालले बिहीबारको टस जितेपछि ब्याटिङको निम्तो पाएको ओमानले निर्धारित २० ओभर खेली ९ विकेट गुमाई १ सय ४५ रनमात्र बनायो । 

त्रिवि क्रिकेट मैदान कीर्तिपुरमा करण केसीले पहिलो ओभरमा कश्यप प्रजापतिलाई ८ रनमा विकेटकिपर आसिफ शेखबाट क्याच गराई नेपाललाई उत्कृष्ट सुरुआत दिलाएका थिए । अर्को एन्डबाट लगातार चार ओभर बलिङ गरेका सोमपाल कामीले अकिब इल्याजलाई २ र शोएब खानलाई शून्य रनमा बोल्ड गरेपछि नेपालले खेल पूर्ण नियन्त्रणमा लिएको थियो ।

ओपनर प्रतीक अठवालेले २४ रन बनाए । उनले १८ बल खेली २ चौका र १ छक्का प्रहार गरे । कप्तान जीशन मक्सुदले ओमानबाट सर्वाधिक ३२ रन बनाए । उनले २६ बल खेली १ चौका र ३ छक्का प्रहार गरे । सन्दीप लामिछानेले आयान खान र मेहरान खानलाई लगातार बलमा आउट गरे । आयानले २५ बल खेली २ चौकासहित १८ रन बनाए ।

नसिम खुशीले १४ बलमा २५ रन बनाएपछि ओमानको स्कोर हेर्नलायक बनेको थियो । उनले समान २ चौका र छक्का प्रहार गरे । सकिल अहमद १७ बलमा २२ रन बनाई अविजित रहे । उनले २ चौका र १ छक्का प्रहार गरे ।

नेपालबाट करण केसीले ३ विकेट लिए । उनले ४ ओभरमा ४३ रन खर्चे । सोमपालले ४ ओभरमा १६ र सन्दीपले ३० रन खर्चेर समान २÷२ विकेट लिए । अविनाश बोहरा र गुल्शनले १–१ विकेट लिए । अविनाशले ४ ओभरमा १८ र गुल्शनले ३५ रन खर्चे ।