कांग्रेस सांसद गौतमद्वारा सदनमै मौनधारण

१६ कात्तिक, काठमाडौं । आफूले उठाएका माग सम्बोधन नगरेको भन्दै सत्तारुढ दल नेपाली कांग्रेसका सांसद सञ्जय गौतमले संसद बैठकमा एक मिनेट मौनधारण गरेका छन् । बिहीबारको प्रतिनिधिसभा बैठकमा शून्य समयमा बोल्ने पालो आउँदा उनले मौनधारण गरेका हुन् । सहमति कार्यान्वयन नभएको भन्दै पटक पटक उनले आवाज उठाउँदै आएका छन् । 

आफूले आफ्नो निर्वाचन क्षेत्र बर्दियाको विषयसहित उठाएका अन्य विषय सरकारले नसुनेको भन्दै सांकेतिक रुपमा मौनधारण गरेर सरकारको विरोध गरेका हुन् ।

आफ्नो निर्वाचन क्षेत्रमा पटक पटक आवाज उठाउँदा पनि पुल निर्माण नभएको भन्दै उनी पुलमुनि गएर अनसन बसेका थिए । जबदी पुलमुनि १५ बुँदे माग राख्दै गएको जेठमा उनी आमरण अनसनमा बसेका थिए ।