कांग्रेसको महासमिति बैठक एक हप्ता सर्न सक्ने

१७ कात्तिक, काठमाडौं । नेपाली कांग्रेसले आगामी मंसिर १३ देखि १५ सम्म काठमाडौंमा गर्ने भनेको महासमितिको बैठक सार्ने तयारी गरेको छ । महासमितिको बैठक एक हप्ता पर सार्ने विषयमा महामन्त्रीद्वय विश्वप्रकाश शर्मा  र गगन थापालगायतका पदाधिकारी तथा नेताहरूसँग सभापति शेरबहादुर देउवाले परामर्श गरिरहेका छन् । 

धुम्बाराहीमा महासमितिको बैठक सार्नेबारे छलफल भइरहेको कांग्रेसका एक नेताले नेपालबहसलाई बताए । उनका अनुसार तयारी नपुगेको भन्दै महासमितिको बैठक एक साता सार्ने विषयमा छलफल भइरहेको छ । सभापति देउवा उपचारका लागि भारत जाने बुझिएको छ । देउवा बिहीबार नै भारत जाने भन्ने थियो तर, महासमितिको बैठकबारे छलफल गर्नुपर्ने भएकोले रोकिएको ती नेताले बताए । 
 
कांग्रेसले मंसिरमा हुने महासमिति बैठकका लागि तयारी सुरू गरेको थियो । पार्टीले लिने नीति तय गर्न कांग्रेसले मंसिर १३, १४ र १५ गते महासमिति बैठक गर्न लागेको थियो । बैठक तयारी गर्न सभापति शेरबहादुर देउवाको संयोजकत्वमा मूल आयोजक समिति पनि गठन गरिएको छ । समितिमा केन्द्रीय पदाधिकारी, केन्द्रीय सदस्य, प्रदेश सभापतिहरू, काठमाडौं, ललितपुर र भक्तपुर जिल्ला सभापति, भ्रातृ संस्थाका अध्यक्षहरू सदस्य छन् ।