तारा एयरका पाइलटबीच रामेछापमा कुटाकुट, जहाज र पाइलट ग्राउन्डेड

१७ कात्तिक,काठमाडौं । रामेछाप विमानस्थलमा तारा एयरका दुई पाइलटबीच कुटाकुट भएको छ । शुक्रबार बिहान ८ बजे तारा एयरको ट्वीनअटर विमान लुक्लाबाट रामेछाप विमानस्थलमा अवतरण गराएका वरिष्ठ क्याप्टेन सन्तोष साह र त्यही कम्पनीका अर्का क्याप्टेन सञ्जीव श्रेष्ठबीच रामेछाप विमानस्थलको एप्रोनमा कुटाकुट भएको हो । 

नागरिक उड्डयन प्राधिकरणका अनुसार अहिले दुवै पाइलट र जहाजलाई ग्राउन्डेड गरिएको छ । रामेछाप विमानस्थलका अनुसार बिहान ८ बजे लुक्लाबाट आएको जहाजका क्याप्टेन सन्तोष साह र रामेछापबाट त्यो जहाज लिएर लुक्ला जाने अर्का क्याप्टेन सञ्जीव श्रेष्ठबीच झगडा परेको हो ।

दुवै जना क्याप्टेनको ड्युटी अदलीबदलीको समय थियो । ‘क्याप्टेन साह विमानस्थल भवनतर्फ आउँदै गर्दा अर्का क्याप्टेन श्रेष्ठ जहाजतर्फ जाँदै थिए । सन्तोष साहले हात मिलाउन खोज्दा सञ्जीवले धकेले । उनी लडेपछि दुई जनाले हानाहान गरे । उक्त जहाजलाई लुक्ला विमानस्थलमै ग्राउन्डेड गरिएको छ ।

यस घटनाका बारेमा तारा एयरलाइन्सका प्रवक्ता सुदर्शन बर्तौलाले कम्पनीबाट इन्क्वायरी भइरहेको बताएका छन् । यो झगडा उनीहरूको व्यक्तिगत विषयमा भएको देखिन्छ । एयरलाइन्स र उडानसँग सम्बन्धित नभएको उनको भनाइ छ ।