सर्वोच्चको निर्णयले थप साहस मिलेको छः भारती

१७ कात्तिक, काठमाडौं । योगराज भनिने रिगल ढकालको कैद मिनाहा गर्ने सरकारको निर्णय सर्वोच्च अदालतले बदर गरिदिएपछि आफूलाई थप साहस थपिएको भारती मानन्धरले बताएकी छन् । 

नेपालगन्जका चेतन मानन्धरको हत्यामा दोषी ठहर भएका रिगलले संविधान दिवसको अवसरमा मन्त्रिपरिषद्को सिफारिसमा राष्ट्रपतिबाट कैद मिनाहा पाएका थिए । रिगलको आममाफी सर्वोच्च अदालतले बिहीबार बदर गरिदिएको थियो ।

शुक्रबार काठमाडौंमा पत्रकार सम्मेलन गरी चेतनका श्रीमती भारतीले आफूलाई डर त्रास, धम्की र पैसाका बार्गेनिङहरू आएपनि अन्ततः न्याय पाएको बताइन् । 

उनले आफ्नो टिमले कुनैपनि लोभ लालचमा नरहेर सहयोग गरेकाले न्याय मिलेको बताइन् । अन्यायमा परेका महिलालाई आफ्नो यस कामबाट प्रेरणा मिल्ने आशा गरेको बताइन् ।