भूकम्प अपडेट : जाजरकोटमा ९२ जनाकाे मृत्यु ६४ घाइते, रुकुममा ३७ काे ज्यान गयाे ५७ घाइते

 

१८ कात्तिक, काठमाडौं । पश्चिम नेपालको जाजरकोटस्थित रामीडाँडा केन्द्र बिन्दु भएर शुक्रबार मध्यराती गएको ६.४ म्याग्निच्युडको भूकम्पमा परी अहिले बिहान ७ बजेसम्ममा जाजरकोटमा ९२ र रुकुम पश्चिममा ३७ जनाको मृत्यु भएको छ ।

नेपाल प्रहरीका प्रवक्ता डीआईजी कुबेर कडायतका अनुसार जाजरकोटमा ६४ र रुकुममा ५७ जना घाईते भएका छन् । अहिले नेपाली सेना, सशस्त्र प्रहरी, नेपाली प्रहरी उद्धारको लागि खटिएको छ । 

‘उद्धार कार्य भइरहेको छ, मृतकको संख्या बढनसक्ने देखिएको छ, ‘डीआईजी कडायतले भने, ‘हाम्रो मेडिकल टिम तयारी अवस्थामा छ, सेना र सशस्त्रका नजिकका युनिट समेत सक्रिय भएका छन् ।’ राष्ट्रिय भूकम्प मापन केन्द्रका प्रमुख लोकविजय अधिकारीका अनुसार शुक्रबार राति ११ः ४७ मा जाजरकोटको रामीडाँडा केन्द्रविन्दु भएर ६.४ म्याग्निच्युडको भूकम्प गएको हो। भूकम्पले कर्णालीमा ठूलो क्षति भएको छ ।

जाजरकोट केन्द्रविन्दु भएर गएको भूकम्पको धक्का राजधानी काठमाडौंसम्म महसुस भएको थियो । नेपाल एपिएफ अस्पताल बलम्बुबाट डा. रोशन पराजुली सहितको ९ जनाको  मेडिकल टिम नेपाली सेनाको स्काइ ट्रक मार्फत जाजरकोट पठाइएकाे छ ।